ଶ୍ରମିକଙ୍କ ପୁଅ ହେଲେ ଇସ୍ରୋ ବୈଜ୍ଞାନିକ

ମୁମ୍ବାଇ,୧୮ା୬: ଦୃଢ଼ ଇଚ୍ଛାଶକ୍ତି ଥିଲେ ମଣିଷ ସବୁ ଅସାଧ୍ୟ କାମକୁ ସାଧନ କରିପାରେ। ସେମିତି କରି ଦେଖାଇଛନ୍ତି ଜଣେ ଶ୍ରମିକଙ୍କ ପୁଅ। କଠିନ ଅଧ୍ୟବସାୟ ବଳରେ ସେ ଭାରତୀୟ ମହାକାଶ ଗବେଷଣା ସଂଗଠନ(ISRO)ର ବୈଜ୍ଞାନିକ ହୋଇପାରିଛନ୍ତି।

କ୍ଷେତରେ କାମ କରୁଥିବା ମାତାପିତାଙ୍କ ଏକମାତ୍ର ପୁଅ ଇସ୍ରୋ ବୈଜ୍ଞାନିକ ହେବା କଳ୍ପନା ବାହାରେ। ପନ୍ଦରପୁରର ସୋମନାଥ ମାଳି ମହାରାଷ୍ଟ୍ରର ଏକମାତ୍ର ଛାତ୍ର ଯିଏକି ଇସ୍ରୋରେ ମନୋନୀତ ହୋଇଛନ୍ତି। ସୋମନାଥ ନନ୍ଦୁ ମାଳି ପନ୍ଦରପୁର ତହସିଲ ସାର୍କୋଲିର ବାସିନ୍ଦା ଅଟନ୍ତି। ଗ୍ରାମାଞ୍ଚଳର ଏକ ବିଦ୍ୟାଳୟରେ ସୋମନାଥ ତାଙ୍କର ଶିକ୍ଷା ସମାପ୍ତ କରିଛନ୍ତି। ସରକାରୀ ବିଦ୍ୟାଳୟରୁ ଇସ୍ରୋ ପର୍ଯ୍ୟନ୍ତ ଯାତ୍ରା ବହୁ ସଂଘର୍ଷମୟ ପରିସ୍ଥିତିରେ ସ୍ଥିର ହୋଇଛି। ପୁଅ ସୋମନାଥଙ୍କୁ ପଢ଼ାଇବା ପାଇଁ ତାଙ୍କ ମାତାପିତା କ୍ଷେତରେ କାମ କରୁଥିଲେ। ସୋମନାଥ ନିକଟରେ କେରଳର ଥିରୁଭନନ୍ତପୁରମ୍‌ରେ ବିକ୍ରମ ସାରାଭାଇ ଅନ୍ତରୀକ୍ଷ ସେଣ୍ଟରରେ ଜଣେ ବରିଷ୍ଠ ବୈଜ୍ଞାନିକ ଭାବରେ ମନୋନୀତ ହୋଇଛନ୍ତି। ମହାରାଷ୍ଟ୍ରର ସେ ଏକମାତ୍ର ପ୍ରତିଯୋଗୀ। ଯିଏକି ଏହି ଅନ୍ତରୀକ୍ଷ ସେଣ୍ଟର ପାଇଁ ମନୋନୀତ ହୋଇଛନ୍ତି।

ସୋମନାଥଙ୍କ ଶିକ୍ଷା ବିଷୟରେ ଯଦି କହିବା ତେବେ ସେ ପ୍ରାଥମିକ ବିଦ୍ୟାଳୟରୁ ୭ମ ଏବଂ ମାଧ୍ୟମିକ ବିଦ୍ୟାଳୟରୁ ଦଶମ ଶ୍ରେଣୀ ଶେଷ କରିବା ପରେ ଯୁକ୍ତ ୨ ପଢ଼ିବା ପାଇଁ ପନ୍ଦରପୁର ଯାଇଥିଲେ। ସେଠାରେ କେବିପି କଲେଜରେ ନାମ ଲେଖାଇଥିଲେ। ୨୦୧୧ରେ ୮୧ ପ୍ରତିଶତ ନମ୍ବର ରଖି ସେ ଦ୍ୱାଦଶ ଶ୍ରେଣୀ ପାସ କରିଥିଲେ। ପରେ ବି.ଟେକ୍‌ କରିବା ପାଇଁ ମୁମ୍ବାଇ ଯାଇଥିଲେ।

ପରେ ଆଇଆଇଟି ଦିଲ୍ଲୀର ମେକାନିକାଲ ଡିଜାଇନର ଭାବରେ ମନୋନୀତ ହୋଇଥିଲେ। ସମଗ୍ର ଭାରତରେ ଗେଟ୍‌(GATE) ପରୀକ୍ଷାରେ ୯୧୬ ତମ ସ୍ଥାନ ହାସଲ କରିଥିଲେ। ଏଠାରେ ସେ ବିମାନ ଇଞ୍ଜିନ ଡିଜାଇନ୍‌ରେ କାମ କରିବାର ସୁଯୋଗ ପାଇଲେ। ଶେଷରେ ସୋମନାଥ ଜୁନ୍‌ ୨ରେ ଇସ୍ରୋର ଜଣେ ବୈଜ୍ଞାନିକ ଭାବରେ ମନୋନୀତ ହୋଇଛନ୍ତି।