କରୋନା ମହାମାରୀ ଯୋଗୁ ଫିକା ପଡିଲା ରଜ ମଉଜ

ବୁଗୁଡ଼ା,୧୬।୬(ଡି.ଏନ.ଏ) : ଗତବର୍ଷ ଭଳି ଚଳିତ ବର୍ଷ ମଧ୍ୟ ବୁଗୁଡ଼ା ଅଞ୍ଚଳରେ ନିରାଡ଼ମ୍ବର ଭାବେ ପାଳିତ ହେଉଛି ରଜ ପର୍ବ। ରଜରେ ଝିଅମାନେ ସାମୂହିକ ଭାବେ ସଜବାଜ ହୋଇ ଗୀତ ଗାଇ ରଜ ପାଳିବା ଏବଂ ପୁଚି ଖେଳିବା ପରମ୍ପରା ରହିଛି । କିନ୍ତୁ, କରୋନା ମହାମାରୀ କାରଣରୁ ଗତବର୍ଷ ଭଳି ଚଳିତ ବର୍ଷ ମଧ୍ୟ ପ୍ରତ୍ୟେକ ପର୍ବ ପର୍ବାଣି ପାଳନ ଉପରେ କଟକଣା ଲାଗିଛି । ସୋମବାର ଅଞ୍ଚଳରେ ପହିଲି ରଜ ଅବସରରେ ଘରେ ଘରେ କୁଆଁରୀମାନେ ଦୋଳିବାନ୍ଧି ଖେଳୁଥିବା ଦେଖିବାକୁ ମିଳିଥିଲା । ସାମୂହିକ ରଜ ପାଳିବା ସମ୍ଭବ ହେଉ ନ ଥିବାରୁ ନିଜ ଘରେ ଝିଅମାନେ ବିଭିନ୍ନ ପ୍ରକାର ସଜବାଜ ହୋଇ ନୂତନ ବସ୍ତ୍ର ପରିଧାନ କରି ରଜ ଦୋଳି ଖେଳୁଥିବା ଦେଖିବାକୁ ମିଳିଥିଲା। ଘରେ ଘରେ ପିଠାପଣା ହୋଇଥିଲେ ସୁଦ୍ଧା ବୁଗୁଡ଼ା ସହରରେ ମିଠା ପାନର ବେପାର ଜମିଥିଲା। ସହରାଞ୍ଚଳରେ ମଙ୍ଗଳବାର ଦିନ ସଂକ୍ରାନ୍ତି ରଜକୁ ମଧ୍ୟ ଅନରୂପ ଭାବେ ନିରାଡ଼ମ୍ବରରେ ପାଳନ କରାଯାଉଥିବା ଦେଖିବାକୁ ମିଳିଥିଲା ବେଳେ ଗ୍ରାମାଞ୍ଚଳରେ କାଁ ଭାଁ କେତେକ ସ୍ଥାନରେ ବାଳିକାମାନେ ମେଳି ହୋଇ ଦୋଳି ଖେଳର ମଜା ନେଉଥିବା ଦେଖା ଯାଇଥିଲା।