ସୋସିଆଲିଜିମ ହାତ ଧରିଲେ ମମତା ବାନାର୍ଜୀ

ଚେନ୍ନାଇ,୧୩।୬: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ବାମ ପନ୍ଥୀ ରାଜନୀତିରେ ଚିରପ୍ରତିଦ୍ୱନ୍ଦ୍ୱୀ ଅଟନ୍ତି। କିନ୍ତୁ ମମତାଙ୍କ ନାମଧାରୀ କନ୍ୟା ତାମିଲନାଡୁ ସାଲେମଠାରେ ସୋସିଆଲିଜିମ ନାମକ ଯୁବକଙ୍କୁ ବିବାହ କରିଛନ୍ତି।

ଇଂରାଜୀ ସାହିତ୍ୟରେ ବ୍ୟାଚଲର ଡିଗ୍ରୀ ହାସଲ କରିଥିବା ପି. ମମତା ବାନାର୍ଜୀଙ୍କ ପରିବାର କଂଗ୍ରେସର ଏକ ବଡ଼ ସମର୍ଥକ। ତୃଣମୂଳ କଂଗ୍ରେସ ସୁପ୍ରିମୋ ଯେତେବେଳେ କଂଗ୍ରେସରେ ଥିଲେ ତାଙ୍କ ଉପରେ ଝିଅର ନାମ ରଖିଥିଲେ ମମତାଙ୍କ ବାପା ମା’। ଅନ୍ୟପକ୍ଷରେ ୨୯ ବର୍ଷୀୟ ବର ବିକମ୍‌ରେ ଡଗ୍ରୀ ହାସଲ କରିଛନ୍ତି। ସେ ରୂପା ଆଙ୍କଲେଟ୍‌ର ବ୍ୟବସାୟ କରନ୍ତି। ତାଙ୍କ ବାପା ଏ. ମୋହନ ସିପିଆଇର ସାଲେମ ଜିଲାର ସମ୍ପାଦକ। ସୋଭିଏଟ୍‌ ୟୁନିଅନ ଖଣ୍ଡବିଖଣ୍ଡିତ ହେବା ପରେ ପୁଅର ନାମ ସୋସିଆଲିଜିମ ରଖିଥିଲେ। ତାଙ୍କର ଆଉ ଦୁଇଟି ପୁଅ ଅଛନ୍ତି। ସେମାନେ ହେଲେ କମ୍ୟୁନିଜିମ ଓ ଲେନିନିଜିମ। ପିଲାଙ୍କ ନାମ ଏଭଳି ରଖିବେ ପାଇଁ ସେ ବିବାହ ପୂର୍ବରୁ ନିଷ୍ପତ୍ତି ନେଇସାରିଥିଲେ।

ତେବେ ନାମ ସହ ଜଡ଼ିତ ରାଜନୈତିକ ଚିରପ୍ରତିଦ୍ୱନ୍ଦ୍ୱିତା ସେମାନଙ୍କୁ ପ୍ରଭାବିତ କରେନାହିଁ। ଆମେ ଏକାଠି ହୋଇଥିବାରୁ ବେଶ୍‌ ଖୁସୀ। ଭଲ ଓ ଖରାପ ସମୟରେ ଆମେ ପରସ୍ପର ସହ ଛିଡ଼ା ହେବୁ। ଯାହା ହେଉ ନା କାହିଁକି, ଆମେ ପୂରା ଜୀବନ ଏକାଠି ରହିବୁ ବୋଲି ସୋସିଆଲିଜିମ କହିଛନ୍ତି। ଏହି ବିବାହ ଉତ୍ସବରେ ତାମିଲନାଡୁର ସିପିଆଇ ମୁଖ୍ୟ ଆର. ମୁଥାରାସାନ ଓ ଦଳୀୟ ଏମ୍‌ପି କେ. ସୁବାରାୟାନ ଯୋଗଦେଇଥିଲେ।