ଟୋକିଓ ଅଲିମ୍ପିକ୍ସ: ଛୁଟି ନେଲେ କ୍ଳାନ୍ତ ଟୋକିଓ ଗଭର୍ନର

ଟୋକିଓ,୨୪।୬: ଅଲିମ୍ପିକ୍ସ ଆରମ୍ଭ ହେବାକୁ ଆଉ ଠିକ୍‌ ମାସେ ରହିଥିବା ବେଳେ ଟୋକିଓ ଗଭର୍ନର ୟୁରିକୋ କୋଇକେ ଛୁଟି ନେଇଛନ୍ତି। ଅତ୍ୟଧିକ ମାତ୍ରାରେ କ୍ଲାନ୍ତ ହୋଇଥିବାରୁ ସେ ବିଶ୍ରାମ ନେବାକୁ ନିଷ୍ପତ୍ତି ନେଇଛନ୍ତି ବୋଲି ମେଟ୍ରୋପଲିଟାନ ସରକାର ସୂଚନା ଦେଇଛନ୍ତି। ଆୟୋଜକ ସହରର ନେତୃତ୍ୱ ନେଉଥିବା କାରଣରୁ କୋଇକେ ଅଲିମ୍ପିକ୍ସ ଓ ପାରା ଅଲିମ୍ପିକ୍ସ ପ୍ରସ୍ତୁତି ନେଇ ବିଭିନ୍ନ ଦାୟିତ୍ୱରେ ରହିଥିଲେ। ଏଥିସହ ସେ ଟୋକିଓରେ ଚାଲିଥିବା କରୋନ ଭାଇରସ ଲଢେଇ ଅଗ୍ରଣୀ ଭୂମିକାରେ ମଧ୍ୟ ଥିଲେ।
କୋଇକେ ବିଳମ୍ବିତ ରାତି ପର୍ଯ୍ୟନ୍ତ କାର୍ଯ୍ୟ କରୁଥିଲେ। ବରିଷ୍ଠ ଅଧିକାରୀମାନଙ୍କ ସହ ସେ ମଧ୍ୟ ବୈଠକରେ ବସୁଥିଲେ। ମଙ୍ଗଳବାର ସେ କୋଭିଡ୍‌-୧୯ ସମ୍ପର୍କିତ ଏକ ବୈଠକରେ ଯୋଗ ଦେଇଥିଲେ ଓ ନିଜର କଣ୍ଠସ୍ବର ଖରାପ ହୋଇଥିବାରୁ କ୍ଷମା ମାଗିଥିଲେ। ସେ ହସ୍ପିଟାଲରେ ଭର୍ତ୍ତି ହୋଇଛନ୍ତି ବୋଲି ଜାପାନର କେତେକ ଗଣମାଧ୍ୟମ ରିପୋର୍ଟ ପ୍ରକାଶ କରିଛନ୍ତି। ଜୁଲାଇ ୧୫ ତାରିଖରେ କୋଇକେ ୬୯ ବର୍ଷରେ ପଦାର୍ପଣ କରିବେ। ସେ ଦୀର୍ଘ ୨୦ ବର୍ଷ ଧରି ଜାପାନ ଶାସକ ଦଳ କଞ୍ଜରଭେଟିଭ ଲିବେରାଲ ଡେମୋକ୍ରାଟିକ ପାର୍ଟିର ସଦସ୍ୟ ରହିଛନ୍ତି। ସେ ପାର୍ଟିର ଓ କ୍ୟାବିନେଟର ବିଭିନ୍ନ ଗୁରୁତ୍ୱପୂର୍ଣ୍ଣ ପଦରେ ରହି ସଫଳତାର ସହ ଦାୟିତ୍ୱ ସମ୍ପାଦନ କରିଛନ୍ତି। ସେ ଜାପାନର ପ୍ରଥମ ମହିଳା ପ୍ରତିରକ୍ଷା ମନ୍ତ୍ରୀ ଭାବେ କାର୍ଯ୍ୟ କରିଛନ୍ତି। ଟୋକିଓ ଗଭର୍ନର ଭାବେ ସେ ବିଭିନ୍ନ ଉନ୍ନତିମୂଳକ କାର୍ଯ୍ୟକରି ବେଶ୍‌ ପ୍ରଶଂସିତ ହୋଇଛନ୍ତି।