ନୂଆ ବିପିଏଲ୍‌ ତାଲିକା ପ୍ରସ୍ତୁତିରେ ଅନିଶ୍ଚିତତା

କଟକ ସଦର, ୩।୬(ଡି.ଏନ.ଏ.): ଦେଶରେ ଦାରିଦ୍ର୍ୟ ସୀମାରେଖା ତଳେ ଥିବା ଲୋକଙ୍କୁ ଚିହ୍ନଟ କରିବା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ବିପିଏଲ ଗାଇଡ୍‌ଲାଇନ୍‌ ପ୍ରସ୍ତୁତ ହୋଇଥିଲା। ଏହି ଗାଇଡ୍‌ଲାଇନ୍‌ ଅନୁଯାୟୀ ବିପିଏଲ୍‌ ତାଲିକା ପ୍ରସ୍ତୁତ କରିବା ପାଇଁ କେନ୍ଦ୍ର ସରକାର ସବୁ ରାଜ୍ୟକୁ ନିର୍ଦ୍ଦେଶନାମା ଜାରି କରିଥିଲେ। ତଦନୁଯାୟୀ, ୧୯୯୨ ମସିହାରେ ପ୍ରଥମଥର ଓଡ଼ିଶା ସରକାରଙ୍କ ପକ୍ଷରୁ ବିପିଏଲ୍‌ ତାଲିକା ପ୍ରକାଶ ପାଇଥିଲା। ଏହାର ୫ ବର୍ଷ ପରେ ଅର୍ଥାତ୍‌ ୧୯୯୭ରେ ପୁନର୍ବାର ସର୍ଭେ କରାଯାଇଥିଲା। ପ୍ରସ୍ତୁତ ତାଲିକା କାର୍ଯ୍ୟକାରୀ ହେବା ଦିନଠାରୁ ୫ ବର୍ଷ ପର୍ଯ୍ୟନ୍ତ ବଳବତ୍ତର ରହିବ ବୋଲି ରାଜ୍ୟ ପଞ୍ଚାୟତିରାଜ ବିଭାଗ ସମୟସୀମା ନିର୍ଦ୍ଧାରଣ କରିଥିଲା। ଇତିମଧ୍ୟରେ ୨୦ ବର୍ଷରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ କେନ୍ଦ୍ର ସରକାରଙ୍କ ନୂତନ ଗାଇଡ୍‌ଲାଇନ୍‌ ଆସି ନ ଥିବାରୁ ନୂଆ ବିପିଏଲ୍‌ ତାଲିକା ପ୍ରସ୍ତୁତିରେ ଅନିଶ୍ଚିତତା ଦେଖାଦେଇଛି ବୋଲି ରାଜ୍ୟ ପଞ୍ଚାୟତିରାଜ ଓ ପାନୀୟଜଳ ବିଭାଗ ଦ୍ୱାରା ଜାରି ହୋଇଥିବା ସୂଚନାରୁ ଜଣାପଡିଛି। ଫଳରେ କେନ୍ଦ୍ର ସରକାରଙ୍କ ସମୟକୁ ସମୟ ଘୋଷିତ ସମସ୍ତ ସୁବିଧା କେବଳ ୧୯୯୭ ମସିହାର ବିପିଏଲ୍‌ ହିତାଧିକାରୀମାନେ ପାଉଛନ୍ତି। ଯେପରି ଜାତୀୟ ପରିବାର ମଙ୍ଗଳ ଯୋଜନା, ଇନ୍ଦିରା ଗାନ୍ଧୀ ପେନ୍‌ସନ, ରାଜୀବ ଓ ଦୀନ୍‌ଦୟାଲ ଜ୍ୟୋତି ଯୋଜନାରେ ମାଗଣା ବିଦ୍ୟୁତ୍‌ ଲାଇନ୍‌, ମାଗଣା ଉଜ୍ଜ୍ୱଳା ଗ୍ୟାସ୍‌ ସଂଯୋଗ ଭଳି ସୁବିଧା ଅନ୍ତର୍ଭୁକ୍ତ।
୨୦୧୬ରେ ପ୍ରକାଶିତ ଏସ୍‌ଇସିସି(ସାମାଜିକ ଅର୍ଥନୈତିକ ଜାତିଭିତ୍ତିକ ଗଣନା)ରେ ଥିବା ହିତାଧିକାରୀମାନେ କେନ୍ଦ୍ରୀୟ ଯୋଜନାର ସୁଫଳ ପାଇପାରୁନାହାନ୍ତି। କାରଣ ଉକ୍ତ ତାଲିକାରେ ଥିବା ଗରିବ ପରିବାରକୁ କେନ୍ଦ୍ର ସରକାର ବିପିଏଲ୍‌ ହିତାଧିକାରୀ ଭାବେ ମାନ୍ୟତା ଦେଇନାହାନ୍ତି ବୋଲି ପଞ୍ଚାୟତିରାଜ ଓ ପାନୀୟଜଳ ବିଭାଗର ଅନୁଶାସନ ସଚିବ ପତ୍ରସଂଖ୍ୟା ପିଆର-ପିଇ ଆଣ୍ଡ ଏସ୍‌ଡି-ଏସ୍‌ଇସିସି-୦୦୦୬-୨୦୧୭/୭୦୬୯/୧୫ା୪ା୨୧ରେ ଉଲ୍ଲେଖ କରିଛନ୍ତି। ଏହି ଅବସରରେ ୧୯୯୭ ବିପିଏଲ୍‌ ତାଲିକାରେ ଥିବା ହିତାଧିକାରୀମାନେ ବିଜୁ ପକ୍କାଘର, ପ୍ରଧାନମନ୍ତ୍ରୀ ଆବାସ ଯୋଜନାର ସୁବିଧା ପାଇସାରିଛନ୍ତି। ତେଣୁ ୨୦୧୬ ଏସ୍‌ଇସିସି ତାଲିକାରୁ ମନୋନୟନ କରି ଓଡ଼ିଶା ସରକାରଙ୍କ ସମସ୍ତ ସହାୟତା ଯୋଗାଇ ଦିଆଯାଉଛି ବୋଲି ପଞ୍ଚାୟତିରାଜ ଓ ପାନୀୟଜଳ ବିଭାଗର ଅନୁଶାସନ ସଚିବ ଏଲ୍‌. ନାୟକ ପତ୍ରସଂଖ୍ୟା ୪୬୪୭/୯ା୩ା୨୧ରେ ସୂଚନା ଦେଇଛନ୍ତି। ସୂଚନାଯୋଗ୍ୟ, ୨୦୧୬ ଏସ୍‌ଇସିସି ତାଲିକାରେ ରାଜ୍ୟର ୮୬,୭୭,୬୧୫ ଗ୍ରାମୀଣ ପରିବାର ବସବାସ କରୁଥିବା ଜଣାପଡିଛି।