ସ୍ବତନ୍ତ୍ର ଦିନକୁ ସ୍ମରଣୀୟ କରିପାରିଲେ ନାହିଁ ବିରାଟ କୋହଲି: ଆଇପିଏଲ୍‌ ସାଥୀ ଖେଳାଳି କରିଦେଲେ ଫିକା

ସାଉଥମ୍ପଟନ,୨୦।୬: ଭାରତୀୟ ଅଧିନାୟକ ବିରାଟ କୋହଲି ଆଜି ତାଙ୍କ ଟେଷ୍ଟ କ୍ୟାରିୟରର ୧୦ ବର୍ଷ ପୂରଣ କରିଛନ୍ତି। ଆଜି ତାଙ୍କ ପାଇଁ ଏକ ସ୍ବତନ୍ତ୍ର ଦିନ। କିନ୍ତୁ ବିଶ୍ୱ ଟେଷ୍ଟ ଚାମ୍ପିୟନଶିପ୍‌ର ଫାଇନାଲରେ କୋହଲିଙ୍କର ଆଇପିଏଲ ସାଥୀ କାଇଲ ଜେମିସନ୍‌ ତାଙ୍କ ଏହି ଦିନକୁ ସ୍ମରଣୀୟ କରିବାକୁ ଦେଇନାହାନ୍ତି। କୋହଲି ୪୪ ରନ ସ୍କୋର କରିବା ପରେ ମ୍ୟାଚ୍‌ର ତୃତୀୟ ଦିନରେ ଆଉଟ୍‌ ହୋଇଥିଲେ। ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଖେଳାଯାଉଥିବା ଅନ୍ତିମ ମ୍ୟାଚର ତୃତୀୟ ଦିନରେ ରବିବାର ଓଦା ଗ୍ରାଉଣ୍ଡ ହେତୁ ଖେଳ ଅଧ ଘଣ୍ଟା ବିଳମ୍ବରେ ଆରମ୍ଭ ହୋଇଥିଲା। ବର୍ଷା ହେତୁ ପ୍ରଥମ ଦିନରେ ଖେଳ ଖେଳାଯାଇ ପାରି ନଥିଲା। ଦ୍ୱିତୀୟ ଦିନର ଖେଳ ଶେଷରେ ବିରାଟ କୋହଲି ୪୪ରେ ଅପରାଜିତ ରହିଥିଲେ। ତୃତୀୟ ଦିନରେ ସେ ନିଜ ଇନିଂସରେ ଗୋଟିଏ ରନ ମଧ୍ୟ ଯୋଡିପାରି ନ ଥିଲେ। ତାଙ୍କୁ କାଇଲ ଜେମସନ ଆଉଟ୍‌ କରିଥିଲେ। ବିରାଟ କୋହଲିଙ୍କ ଦଳ ଆରସିବିରୁ କାଇଲ ଜେମିସନ୍‌ ଆଇପିଏଲରେ ଖେଳନ୍ତି।
ବିରାଟ କୋହଲିଙ୍କ ଟେଷ୍ଟ କ୍ୟାରିୟର ବିଷୟରେ କହିବାକୁ ଗଲେ ସେ ୯୨ଟି ଟେଷ୍ଟର ୧୫୪ ଇନିଂସରେ ୭୫୩୪ ରନ ସଂଗ୍ରହ କରିଛନ୍ତି। ୨୭ ଶତକ ଏବଂ ୨୫ଟି ଅର୍ଦ୍ଧଶତକ ହାସଲ କରିଛନ୍ତି। ଅର୍ଥାତ୍‌ ଟେଷ୍ଟରେ ତାଙ୍କର ଅର୍ଦ୍ଧଶତକରୁ ଅଧିକ ଶତକ ଅଛି। ଅଧିନାୟକ ଭାବେ କୋହଲି ଭାରତ ପାଇଁ ସର୍ବାଧିକ ରନ ସ୍କୋରର। ମୋଟ ଉପରେ ସେ ବିଶ୍ୱର ଚତୁର୍ଥ ସ୍ଥାନରେ ଅଛନ୍ତି। କୋହଲି ହାରାହାରି ୫୯ରେ ଅଧିନାୟକ ଭାବରେ ୯୯ ଇନିଂସରେ ୫୪୩୬ ରନ ସଂଗ୍ରହ କରିଛନ୍ତି। ସେ ୨୦ ଶତକ ଏବଂ ୧୫ ଅର୍ଦ୍ଧଶତକ ହାସଲ କରିଛନ୍ତି। ମହେନ୍ଦ୍ର ସିଂ ଧୋନୀ ୩୪୫୪ ରନ ସହ ଭାରତୀୟ ଅଧିନାୟକ ଭାବରେ ଦ୍ୱିତୀୟ ସ୍ଥାନରେ ଅଛନ୍ତି।