ଏଫ୍‌ସି ବେୟର୍ନ ବିଶ୍ୱ ଦଳରେ ଶୁଭୋ ପଲ୍‌

ନୂଆଦିଲ୍ଲୀ, ୧୨ା୬ (ପି.ଟି.)- ଦିଲ୍ଲୀଭିତ୍ତିକ ସୁଦେଭା ଏଫ୍‌ସି ଆଇ-ଲିଗ୍‌ ଦଳର ଅଧିନାୟକ ଶୁଭୋ ପଲ୍‌ ପ୍ରସିଦ୍ଧ ଜର୍ମାନ ଫୁଟ୍‌ବଲ କ୍ଲବ ଏଫ୍‌ସି ବେୟର୍ନର ୧୯ ବର୍ଷରୁ କମ୍‌ ବିଶ୍ୱ ଦଳରେ ସ୍ଥାନ ପାଇଛନ୍ତି। ଏଫ୍‌ସି ବେୟର୍ନ ବିଶ୍ୱ ଦଳର ଏକ ଟ୍ରେନିଂ କ୍ୟାମ୍ପ ମ୍ୟୁନିକ୍‌ରେ ହେବ। ଏଥିରେ ୧୭ ବର୍ଷୀୟ ପଲ୍‌ ଯୋଗ ଦେବେ। ଏଥିରେ ଯୁବ ଫୁଟ୍‌ବଲରମାନେ ଏଫ୍‌ସି ବେୟର୍ନ ସମ୍ପର୍କରେ ଜାଣିବା ଲାଗି ଏକ ସୁଯୋଗ ପାଇବେ। ସେମାନେ ୧୯ବର୍ଷରୁ କମ୍‌ ଏଫ୍‌ସି ବେୟର୍ନ ଦଳ ସହିତ ଏକ ମ୍ୟାଚ ଖେଳିବେ। ବିଶ୍ୱକପ୍‌ ବିଜେତା କିମ୍ବଦନ୍ତୀ କ୍ଲାଅସ୍‌ ଅଗେନଥଲର ଏବଂ ସେମାନଙ୍କ ଇଣ୍ଟରନ୍ୟାଶନାଲ ପ୍ରୋଗ୍ରାମ୍‌ର କୋଚ୍‌ ଖ୍ରୀଷ୍ଟୋଫର ଲୋଚ୍‌ଙ୍କ ନେତୃତ୍ୱରେ ଏଫ୍‌ସି ବେୟର୍ନ ଏକ ଟ୍ୟାଲେଣ୍ଟ ହଣ୍ଟ୍‌ କାର୍ଯ୍ୟକ୍ରମ ଜରିଆରେ ସମଗ୍ର ବିଶ୍ୱର ୧୫ଜଣ ଖେଳାଳିଙ୍କୁ ମନୋନୀତ କରାଯାଇ ଏକ ବିଶ୍ୱ ଦଳ ଗଠନ କରାଯାଇଥାଏ। ଟ୍ୟାଲେଣ୍ଟ ହଣ୍ଟ କାର୍ଯ୍ୟକ୍ରମରେ ସାମିଲ ହେବା ଲାଗି ଖେଳାଳିମାନଙ୍କୁ ସେମାନଙ୍କର ଏକ ଶର୍ଟ ଭିଡିଓ ପଠାଇବାକୁ ହୋଇଥାଏ। ଖେଳାଳି ଜଣକ ୨୦୦୩ କିମ୍ବା ୨୦୦୪ରେ ଜନ୍ମଗ୍ରହଣ କରିଥିବା ଆବଶ୍ୟକ। ଏଫ୍‌ସି ବେୟର୍ନ ୧୯ ବର୍ଷରୁ କମ୍‌ ବିଶ୍ୱ ଦଳ ଅନ୍ୟ ବୁନ୍ଦେସ୍‌ଲିଗା ଟିମ୍‌ ସହ ଖେଳିବ ଏବଂ ସେଠାରେ ପ୍ରାୟ ଦୁଇ ସପ୍ତାହ ଧରି ଟ୍ରେନିଂ ନେବ। ଭାରତର ୧୭ ବର୍ଷରୁ କମ୍‌ ଦଳର ଅନ୍ୟତମ ସଦସ୍ୟ ପଲ୍‌ଙ୍କୁ ଯେତେବେଳେ ମାତ୍ର ୧୨ବର୍ଷ ବୟସ ହୋଇଥିଲା, ସେ ସୁଦେଭାରେ ଫୁଟ୍‌ବଲ ଖେଳିବା ଆରମ୍ଭ କରିଥିଲେ। ୨୦୧୭ରେ ଗ୍ରାସ୍‌ରୁଟ୍‌ ଓ ୟୁଥ୍‌ ଟ୍ରାଏଲ୍‌ ବେଳେ ସେ ସୁଦେଭାର ସ୍କାଉଟିଂ ଟିମ୍‌ ପାଇଁ ମନୋନୀତ ହୋଇଥିଲେ। ୨୦୧୭ ମେ’ ମାସଠାରୁ ପଲ୍‌ ବୋର୍ଡିଂ, ଲଜିଂ, ଟ୍ରେନିଂ ଓ ସ୍କୁଲିଂ ସୁବିଧା ପାଇ ଆସୁଛନ୍ତି।