ବେଙ୍ଗ ସହ ହିନ୍ଦୁଙ୍କୁ ତୁଳନା କଲେ ଆରଏସ୍‌ଏସ୍‌ ନେତା

କୋଲକାତା,୬।୬ : ହିନ୍ଦୁ ସମ୍ପ୍ରଦାୟ ବେଙ୍ଗ ଭଳି ଆଚରଣ କରୁଛନ୍ତି। ଓଜନ ମପା ଯାଉଥିବା ଯନ୍ତ୍ରରେ ଦୁହିଁଙ୍କୁ ମାପିବା କଷ୍ଟକର। ଏଭଳି ମନ୍ତବ୍ୟ ଦେଇଛନ୍ତି ପଶ୍ଚିମବଙ୍ଗର ରାଷ୍ଟ୍ରୀୟ ସ୍ବୟଂ ସେବକ ସଂଘ (ଆରଏସ୍‌ଏସ୍‌)ର ଇଣ୍ଟେଲେକଚୁଆଲ ବିଭାଗର ସଭାପତି ରାଜେଶ ଶ୍ରୀବାସ୍ତବ।

ରାଧିକା ରମଣଙ୍କ ଅଧ୍ୟକ୍ଷତାରେ ବିହାର ନିର୍ବାଚନ ସେଲ୍‌ ଦ୍ୱାରା ରବିବାର ଆୟୋଜିତ ଭର୍ଚୁଆଲ ଆଲୋଚନାରେ ସେ ଉପରୋକ୍ତ ମନ୍ତବ୍ୟ ଦେଇଛନ୍ତି। ପଶ୍ଚିମବଙ୍ଗ ନିର୍ବାଚନ ପରେ ରାଜ୍ୟରେ ଦେଖାଦେଇଥିବା ହିଂସା ଓ ଗଣତନ୍ତ୍ର ପ୍ରତି ସୃଷ୍ଟି ହୋଇଥିବା ବିପଦ ସମ୍ପର୍କରେ ବୈଠକରେ ଆଲୋଚନା ହୋଇଥିଲା। ମମତା ବାନାର୍ଜୀ ଓ କେତେଜଣ ଉଗ୍ର ଚିନ୍ତାଧାରାର ନେତା ମୁସଲମାନ ସମ୍ପ୍ରଦାୟକୁ ଏକାଠି କରି ହିନ୍ଦୁମାନଙ୍କ ବିରୋଧରେ ଷଡ଼ଯନ୍ତ୍ର କରୁଛନ୍ତି। ସେମାନଙ୍କ ଷଡଯନ୍ତ୍ରକୁ ବିଫଳ କରିବାକୁ ପଡ଼ିବ ବୋଲି ଶ୍ରୀବାସ୍ତବ କହିଥିଲେ।

ଆମେ ସନ୍ତୋଷଜନକ ପ୍ରଦର୍ଶନ କରିଛୁ। ପୂର୍ବ ଥର ୩ ଆଶନରୁ ପଶ୍ଚିମବଙ୍ଗରେ ଆମେ ୭୭ରେ ପହଞ୍ଚିଛୁ, ଯାହାକି ସହଜ ନୁହେଁ ବୋଲି ଭାଜପାର ଏମ୍‌ଏଲ୍‌ସି ଓ ବିହାରର ସାଧାରଣ ସମ୍ପାଦକ ଦେବଶ କୁମାର କହିଛନ୍ତି। ମହିଳା ଓ ଗରିବ ଶ୍ରେଣୀର ଲୋକଙ୍କ ପାଇଁ ମମତା ବାନାର୍ଜୀ ଘୋଷଣା କରିଥିବା ଯୋଜନା ନିର୍ବାଚନ ଫଳାଫଳ ଉପରେ ପ୍ରଭାବ ପକାଇଥିବା ସେ ସ୍ବୀକାର କରିଛନ୍ତି।