ଶ୍ୱେତ କବକ

କିଛି ରିପୋର୍ଟ ଅନୁଯାୟୀ, ଧଳା ଫଙ୍ଗସ୍‌ ରୋଗ ବୃଦ୍ଧି ପାଇବାରେ ଲାଗିଛି। କୋଭିଡ୍‌ରେ ଆକ୍ରାନ୍ତ ରୋଗୀମାନେ ଧଳା ଫଙ୍ଗସ୍‌ ବା ଶ୍ୱେତ କବକ (ହ୍ବାଇଟ୍‌ ଫଙ୍ଗସ୍‌)ରେ ଅଧିକ ମାତ୍ରାରେ ଆକ୍ରାନ୍ତ ହୋଇଥାଆନ୍ତି, କାରଣ ଏହା ରୋଗ ପ୍ରତିରୋଧକ କ୍ଷମତାକୁ ଦମନ କରିଥାଏ ତଥା ଫୁସ୍‌ଫୁସ୍‌କୁ ପ୍ରଭାବିତ କରି ସମାନ ଲକ୍ଷଣ ସୃଷ୍ଟି କରିଥାଏ। ଏପରି ସମସ୍ୟା ପାଇଁ କ୍ୟାଣ୍ଡିଡା ଏବଂ ଆସ୍ପର୍ଗିଲସ୍‌ ନାମକ ଦୁଇଟି କବକ ମୁଖ୍ୟତଃ ଦାୟୀ। କଳା ଫଙ୍ଗସ୍‌ ଅପେକ୍ଷା ଏଗୁଡ଼ିକ ଅଧିକ ମାତ୍ରାରେ ଦେଖାଦିଏ ଏବଂ ଅଧିକ ଗୁରୁତର ରୋଗର କାରଣ ହୋଇପାରେ। ଦୁର୍ବଳ ରୋଗ ପ୍ରତିରୋଧକ ଶକ୍ତି ଯୋଗୁଁ ଏହି ସଂକ୍ରମଣ ଆଶଙ୍କା ଅଧିକ ମାତ୍ରାରେ ଥାଏ।
କ୍ୟାଣ୍ଡିଡିଆସିସ୍‌ : ସୁସ୍ଥ ମନୁଷ୍ୟ ଶରୀରରେ କ୍ୟାଣ୍ଡିଡା ଚର୍ମ ତଥା ମୁଖ୍ୟ ଏବଂ ଅନ୍ତନଳୀରେ ଅବସ୍ଥିତ ଥାଏ। ଏହାର ସଂକ୍ରମଣ ଶିଶୁ, ବୃଦ୍ଧ ଏବଂ ମହିଳାମାନଙ୍କଠାରେ ଅଧିକ ଦେଖାଯାଏ। କୃତ୍ରିମ ଦାନ୍ତ ସମୂହ, ଗର୍ଭ ନିରୋଧକ ବଟିକା, ହରମୋନ ରିପ୍ଲେସମେଣ୍ଟ ଥେରାପି, ବନ୍ଧ୍ୟାକରଣ ଚିକିତ୍ସା ଦ୍ୱାରା ଏହି ସଂକ୍ରମଣର ଆଶଙ୍କା ବଢ଼ିଥାଏ। ଏହି ଫଙ୍ଗସ୍‌ ଚର୍ମ, ନଖ, ପାଟି, ଗଳା, ଅନ୍ତନଳୀର ଉପରିଭାଗ, ଯୌନାଙ୍ଗକୁ ସାଧାରଣତଃ ପ୍ରଭାବିତ କରିଥାଏ। କିଛି କ୍ଷେତ୍ରରେ ପାକସ୍ଥଳୀ, ଅନ୍ତନଳୀ, ମୂତ୍ରନଳୀ ଏବଂ ଶ୍ୱାସକ୍ରିୟାକୁ ସଂକ୍ରମିତ କରିପାରେ। ଦୀର୍ଘ ସମୟ ଧରି ପହଁରିବା ପୋଷାକ, ଡାଏପର ପରିଧାନ ଦ୍ୱାରା ଚର୍ମ ଆର୍ଦ୍ର ହୋଇ କ୍ୟାଣ୍ଡିନାରେ ସଂକ୍ରମିତ ହୋଇଥାଏ। ଡିଟରଜେଣ୍ଟ ଅଥବା ଡୋଉଚ୍‌ (ଶରୀର ସଫା ରଖିବା ପାଇଁ ବ୍ୟବହୃତ ହେଉଥିବା ତରଳ ପଦାର୍ଥ) ସହ ସଂସ୍ପର୍ଶରେ ଆସିବା ପରେ ତଥା ଗର୍ଭାବସ୍ଥାରେ ଘଟୁଥିବା ହରମୋନ ସ୍ତରରେ ପରିବର୍ତ୍ତନ ଯୋଗୁ ନାରୀମାନଙ୍କ ଯୌନାଙ୍ଗରେ ଏହି ଇନ୍‌ଫେକ୍ସନ ଦେଖାଦିଏ। ସ୍ତନ୍ୟପାନ କରାଉଥିବା ନାରୀମାନଙ୍କର ସ୍ତନାଗ୍ରରେ କ୍ୟାଣ୍ଡିଡା ହୋଇପାରେ। କ୍ୟାଣ୍ଡିଡିଆସିସ୍‌ରେ ଆକ୍ରାନ୍ତ ଯୋନିବାଟେ ଜନ୍ମ ନେଇଥିବା ନବଜାତ ଶିଶୁମାନଙ୍କଠାରେ ମଧ୍ୟ ଏହି ଇନ୍‌ଫେକ୍ସନ ଦେଖାଦିଏ। ଏହାର ସାଧାରଣ ଲକ୍ଷଣ ହେଲା ଜିଭ, ପାଟି ଏବଂ ଗଳାରେ ଉତ୍ତେଜନା, ଧଳା ପ୍ୟାଚ୍‌ ଆଦି। ଏକ୍ସୋଫଙ୍ଗସ୍‌ ସଂକ୍ରମିତ ହେଲେ ଗିଳିବାରେ ଅସୁବିଧା, ଯନ୍ତ୍ରଣା ସହ ପେଟ ଦରଜ, ବାନ୍ତି ଆଦି ଦେଖାଦିଏ। ଚର୍ମ କୁଣ୍ଡେଇ ହେବା, ଉତ୍ତେଜନା, ଘା, ନଖ ନଷ୍ଟ ହେବା ଆଦି ସମ୍ଭବ। ପାକସ୍ଥଳୀ, ଅନ୍ତନଳୀ ସଂକ୍ରମିତ ହେଲେ ପେଟ କାଟିବା, ଫୁଲିବା, ବାନ୍ତି, ପତଳା ଝାଡ଼ା, ହାକୁଟି, ଗ୍ୟାସ୍‌, ମଳଦ୍ୱାର କୁଣ୍ଡେଇ ହେବା, ଗ୍ୟାଷ୍ଟ୍ରିକ ଅଲସର୍‌ ଦେଖାଦିଏ। ମୂତ୍ର ତଥା ଶ୍ୱାସକ୍ରିୟା ଜନିତ ଲକ୍ଷଣ ମଧ୍ୟ ଦେଖାଦେଇପାରେ। (କ୍ରମଶଃ..)

ଡା. ସୁନୀଲ କୁମାର କୋଟା
-ମଧୁମେହ, ହରମୋନ୍‌ ରୋଗ ବିଶେଷଜ୍ଞ
ଡାଏବେଟିସ୍‌ ଏଣ୍ଡ୍‌ ଏଣ୍ଡୋକେୟାର କ୍ଲିନିକ୍‌, ବ୍ରହ୍ମପୁର
ମୋ: ୭୭୪୯୮୦୪୪୦୧