ଡବ୍ଲ୍ୟୁଟିସି ଫାଇନାଲରେ କୋହଲି ଭାଙ୍ଗିଲେ ଧୋନୀଙ୍କ ରେକର୍ଡ

ସାଉଥାମ୍ପଟନ,୧୯।୬: ଏଜେସ ବାଉଲଠାରେ ନ୍ୟୁଜିଲାଣ୍ଡ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନଶିପ୍‌ (ଡବ୍ଲ୍ୟୁଟିସି) ଫାଇନାଲରେ ଟିମ୍‌ ଇଣ୍ଡିଆର ଅଧିନାୟକ ଭାବେ ବିରାଟ କୋହଲି ଟସ୍‌ ପକାଇଥିଲେ। ଅବଶ୍ୟ ଟସ୍‌ ଜିତିବା ତାଙ୍କ ଭାଗ୍ୟ ନ ଥିଲା। କିନ୍ତୁ କ୍ରିକେଟର ଲମ୍ବା ଫର୍ମାଟରେ ଭାରତୀୟ ଦଳର ନେତୃତ୍ୱ ନେବାରେ କୋହଲି ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ରେକର୍ଡକୁ ପଛରେ ପକାଇ ଦେଇଛନ୍ତି।

ଡବ୍ଲ୍ୟୁଟିସି ଫାଇନାଲ ଅଧିନାୟକ ଭାବେ କୋହଲିଙ୍କ ୬୧ତମ ମ୍ୟାଚ୍‌। ଯେକୌଣସି ଭାରତୀୟ ଅଧିନାୟକଙ୍କ କ୍ଷେତ୍ରରେ ଏହା ସର୍ବାଧିକ। ଧୋନୀ ଅଧିନାୟକ ଭାବେ ୬୦ଟି ଟେଷ୍ଟ ମ୍ୟାଚ୍‌ ଖେଳିଥିଲେ। ୨୦୧୪ ଡିସେମ୍ବରରେ ଅଷ୍ଟ୍ରେଲିଆ ବିପକ୍ଷ ସିରିଜ୍‌ ମଧ୍ୟରେ ଟେଷ୍ଟ ଫର୍ମାଟରୁ ଅବସର ନେଇଥିଲେ ଧୋନୀ। ଏସିଆର ଯେକୌଣସି ଦେଶ ପାଇଁ ଅଧିନାୟକ ଭାବେ ସବୁଠୁ ଅଧିକ ଟେଷ୍ଟ ଖେଳିବାର ରେକର୍ଡ ମଧ୍ୟ କୋହଲିଙ୍କ ନାମରେ ରହିଛି। ଶ୍ରୀଲଙ୍କାର ଅର୍ଜୁନ ରାଣାତୁଙ୍ଗା ଓ ପାକିସ୍ତାନର ମିଶବା ଉଲ-ହକ୍‌ ୫୬ ଲେଖାଏ ଟେଷ୍ଟରେ ଦଳର ନେତୃତ୍ୱ ନେଇଥିଲେ।

ତେବେ ଅଧିନାୟକ ଭାବେ ଦକ୍ଷିଣ ଆଫ୍ରିକାର ଗ୍ରେମ ସ୍ମିଥ ବିଶ୍ୱରେ ସବୁଠୁ ଅଧିକ ମ୍ୟାଚ୍‌ ଖେଳିଛନ୍ତି। ସେ ୧୦୯ ଟେଷ୍ଟରେ ଦକ୍ଷିଣ ଆଫ୍ରିକା ଦଳର ନେତୃତ୍ୱ ଭାର ସମ୍ଭାଳିଥିଲେ। ଅଧିନାୟକ ଭାବେ ୧୦୦ ଟେଷ୍ଟ ଖେଳିବାରେ ସେ ବିଶ୍ୱର ଏକମାତ୍ର କ୍ରିକେଟର। ତାଙ୍କ ପଛକୁ ରହିଛନ୍ତି ଅଷ୍ଟ୍ରେଲିଆର କିମ୍ବଦନ୍ତୀ ଆଲାନ ବର୍ଡର (୯୩ ଟେଷ୍ଟ)।