‘ଜୟ ଶ୍ରୀ ରାମ’ ନ କହିବାରୁ ମୁସଲିମ ବୃଦ୍ଧଙ୍କୁ ଆକ୍ରମଣ: ରାହୁଲଙ୍କୁ ପାଲଟା ଜବାବ ଦେଲେ ଯୋଗୀ

ନୂଆଦିଲ୍ଲୀ,୧୫।୬: ‘ଜୟଶ୍ରୀ ରାମ’ ନ କହିବାରୁ ଉତ୍ତର ପ୍ରଦେଶର ଗାଜିଆବାଦରେ ଜଣେ ମୁସଲିମ ବୃଦ୍ଧଙ୍କୁ ମାଡ଼ ମରାଯିବା ଓ ଦାଢ଼ି କାଟି ଦେବା ଘଟଣାକୁ ନେଇ ଏବେ ରାଜ୍ୟ ସରକାର ଓ ବିରୋଧୀ ମୁହଁାମୁହିଁ ପରିସ୍ଥିତିରେ।

ଗାଜିଆବାଦର ଲୋନି ଅଞ୍ଚଳରେ ଗତ ୫ ତାରିଖରେ ଅବଦୁଲ ସାମଦ ନାମକ ଜଣେ ମୁସଲିମ ବୃଦ୍ଧଙ୍କୁ ଛୁରି ଦେଖାଇ କିଛି ଦୁର୍ବୃତ୍ତ ‘ଜୟଶ୍ରୀ ରାମ’ କହିବାକୁ ବାଧ୍ୟ କରିଥିଲେ। ଏପରି ନ କରିବାରୁ ମାଡ଼ ମାରିବା ସହ ତାଙ୍କ ଦାଢ଼ି କାଟି ଦେଇଥିବା ଅଭିଯୋଗ ହୋଇଥିଲା। ଭାଇରାଲ ହୋଇଥିବା ଘଟଣାର ଭିଡିଓରେ ଅବଦୁଲ ଆକ୍ରମଣକାରୀଙ୍କ ଆଗରେ ଛାଡ଼ିବା ପାଇଁ ନେହୁରା ହେଉଥିବା ଦେଖିବାକୁ ମିଳିଥିଲା।

ଏହି ଘଟଣାର ଏକ ନ୍ୟୁଜ ରିପୋର୍ଟ ସୋସିଆଲ ମିଡିଆରେ ଶେୟାର କରି କଂଗ୍ରେସ ନେତା ରାହୁଲ ଗାନ୍ଧୀ ଲେଖିଥିଲେ, ” ପ୍ରଭୁ ଶ୍ରୀରାମଙ୍କ ଭକ୍ତମାନେ ଏଭଳି କରିପାରିବେ, ମୁଁ ବିଶ୍ୱାସ କରିବାକୁ ପ୍ରସ୍ତୁତ ନୁହେଁ। ଏପରି ନିଷ୍ଠୁରତା ମାନବିକତାଠାରୁ ଦୂରରେ। ଏହା ଉଭୟ ଧର୍ମ ଓ ସମାଜ ପାଇଁ ଲଜ୍ଜାଜନକ “। କିଛି ଘଣ୍ଟା ପରେ ଏହାର ଉତ୍ତର ଦେଇଥିଲେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ। ”ପ୍ରଭୁ ଶ୍ରୀରାମଙ୍କ ପ୍ରଥମ ଶିକ୍ଷା- ‘ସତ କୁହ’। ଏହା ତୁମ ଜୀବନରେ କେବେ କରି ନାହଁ। ପୋଲିସ ସତ ପ୍ରକାଶ କରିବା ପରେ ମଧ୍ୟ ତୁମେ ସମାଜରେ ବିଷ ଓଗାଳୁଛ। ଏଥି ନେଇ ତୁମେ ଲଜ୍ଜିତ ହେବା ଉଚିତ। ଉତ୍ତର ପ୍ରଦେଶର ଲୋକଙ୍କୁ ଅପମାନିତ କରିବା ବନ୍ଦ କର“ ବୋଲି ମୁଖ୍ୟମନ୍ତ୍ରୀ ଟୁଇଟ୍‌ କରିଛନ୍ତି।

ଘଟଣାରେ ସମ୍ପୃକ୍ତ ୩ ଅଭିଯୁକ୍ତଙ୍କୁ ଗିରଫ କରିବା ସହ ପୋଲିସ ସାମ୍ପ୍ରଦାୟିକତା ଅଭିଯୋଗକୁ ଖଣ୍ଡନ କରିଛି। ପୀଡ଼ିତ ଦେଇଥିବା ଆମଲେଟରେ ଅସନ୍ତୋଷ ଥିବା ୬ ଜଣ ଗ୍ରାହକ ଆକ୍ରମଣ କରିଥିବା ପୋଲିସ ପକ୍ଷରୁ କୁହାଯାଇଛି।