ଭୁବନେଶ୍ୱର,୫।୬(ବ୍ୟୁରୋ): ପ୍ରତିବର୍ଷ ୫ ଜୁନ୍ରେ ବିଶ୍ୱ ପରିବେଶ ଦିବସ ପାଳନ କରାଯାଉଛି । ଏହି ଦିବସରେ ସମଗ୍ର ବିଶ୍ୱ ସମ୍ମୁଖୀନ ହେଉଥିବା ବିଭିନ୍ନ ପରିବେଶ ସମସ୍ୟା ବିଷୟରେ ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରାଯାଇଥାଏ। ଓଡ଼ିଶାରେ ମଧ୍ୟ ସେମିନାର, ୱେବିନାର୍, ପ୍ରତିଯୋଗିତା, ବୃକ୍ଷରୋପଣ କାର୍ଯ୍ୟକ୍ରମ ଆୟୋଜନ କରାଯାଉଛି। ରାଜ୍ୟରେ ପରିବେଶ ସୁରକ୍ଷା କ୍ଷେତ୍ରରେ ଆଗ୍ରହ ସୃଷ୍ଟି କରିବାକୁ ରାଜ୍ୟର ପ୍ରତ୍ୟେକ ବ୍ୟକ୍ତି ଏବଂ ସଂଗଠନକୁ ଉତ୍ସାହିତ କରାଯାଉଛି। ପ୍ରତ୍ୟେକ ବ୍ଲକ୍ରେ ପ୍ରକୃତିମିତ୍ର ଏବଂ ପ୍ରକୃତିବନ୍ଧୁ ପୁରସ୍କାର ଭାବରେ ମାନପତ୍ର ସହିତ ଯଥାକ୍ରମେ ୨୦,୦୦୦ ଏବଂ ୧୦,୦୦୦ ଟଙ୍କା ପୁରସ୍କାର ରାଶି ପ୍ରଦାନ କରାଯାଉଛି। ବିଶ୍ୱ ପରିବେଶ ଦିବସ ପାଳନ ଅବସରରେ ୧୫୫ ପ୍ରକୃତିମିତ୍ର ଏବଂ ୧୬୮ ପ୍ରକୃତିବନ୍ଧୁଙ୍କୁ ପୁରସ୍କୃତ କରାଯିବ। ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ବିକ୍ରମ କେଶରୀ ଆରୁଖ ଏହି ଅବସରରେ ସେମାନଙ୍କୁ ଅଭିନନ୍ଦନ ଜଣାଇଛନ୍ତି।
ବିଶ୍ୱ ପରିବେଶ ଦିବସ-୨୦୨୧ର ବିଷୟବସ୍ତୁ ହେଉଛି ‘ଇକୋସିଷ୍ଟମ୍ର ପୁନରୁଦ୍ଧାର’ ା ରାଜ୍ୟ ବାରମ୍ବାର ବାତ୍ୟା ଓ ବନ୍ୟାର ସମ୍ମୁଖୀନ ହେଉଛି, ଯାହା ଆମ ଇକୋସିଷ୍ଟମ୍କୁ ନଷ୍ଟ କରିଥାଏ। ଏହି ପ୍ରାକୃତିକ ଘଟଣାଗୁଡ଼ିକରୁ ଆମେ ଅନେକ ଜିନିଷ ଶିଖିଛୁ । ପ୍ରଭାବ ହ୍ରାସ କରିବାକୁ ପ୍ରସ୍ତୁତି ପ୍ରଣାଳୀ ଓ ମୁକାବିଲାକୁ ମଜଭୁତ କରିଛୁ । ଉପଯୁକ୍ତ ପରିଚାଳନା ହେତୁ ଅନେକ ଜୀବନ ରକ୍ଷା ହୋଇପାରୁଛି। ଯେଉଁଥିପାଇଁ ଓଡ଼ିଶା ବିଶ୍ୱରେ ଏକ ଉଦାହରଣ ପାଲଟିଛି ବେଲି ମନ୍ତ୍ରୀ କହିଛନ୍ତି। ଇକୋଟୁରିଜମ୍ ସ୍ଥାନଗୁଡ଼ିକର ବିକାଶ କରି ବୃହତ୍ ପଦକ୍ଷେପ ନିଆଯାଇଛି । ପ୍ରକୃତିବନ୍ଧୁ ଓ ପ୍ରକୃତିମିତ୍ରଙ୍କର ପରିବେଶ ସୁରକ୍ଷା ଦିଗରେ ମହତ୍ତ୍ବପୂର୍ଣ୍ଣ ଅବଦାନ ରହିଛି ବୋଲି ମନ୍ତ୍ରୀ ଆରୁଖ କହିଛନ୍ତି।
