କୋଲକାତା, ୯।୬: ପଶ୍ଚିମବଙ୍ଗ ନିର୍ବାଚନରେ ପରାଜୟ ପରେ ଭାଜପାର ଚିନ୍ତା ବଢ଼ିବାରେ ଲାଗିଛି। ଟିଏମ୍ସିର ବହୁ ପୂର୍ବତନ ନେତାଙ୍କ ଭଳି ବରିଷ୍ଠ ନେତା ମୁକୁଲ ରୟ ମଧ୍ୟ ମମତା ବାନାର୍ଜୀଙ୍କ ପାଖକୁ ଫେରିପାରନ୍ତି। କୋଲକାତା ଠାରେ ବୁଧବାର ଗୁରୁତ୍ୱପୂର୍ଣ୍ଣ ବୈଠକ ଡକାଇଥିଲେ ରାଜ୍ୟ ଭାଜପା ମୁଖ୍ୟ ଦୀଲିପ ଘୋଷ। ଏହି ବୈଠକରେ ଯୋଗଦେଇ ନ ଥିଲେ ମୁକୁଲ। ତାଙ୍କ ବ୍ୟତୀତ ଭାଜପାର ଉପ ସଭାପତି ଶୁଭେନ୍ଦୁ ଅଧିକାରୀ ମଧ୍ୟ ବୈଠକରେ ପହଞ୍ଚି ନ ଥିଲେ। ଅଧିକାରୀ ଦିଲ୍ଲୀ ଯାଇଥିବାବେଳେ ମୁକୁଲଙ୍କ ପତ୍ନୀ ଏବେ ହସ୍ପିଟାଲରେ ଭର୍ତ୍ତି ଥିବା ଜଣାପଡ଼ିଛି।
ବୈଠକରେ ମୁକୁଲଙ୍କ ଅନୁପସ୍ଥିତି ଯୋଗୁ ଟିଏମ୍ସିକୁ ତାଙ୍କର ଫେରିବା ନେଇ ଆଶଙ୍କା ଏବେ ସମ୍ଭାବନାରେ ପରିବର୍ତ୍ତିତ ହୋଇଛି। ପଶ୍ଚିମବଙ୍ଗର ଟାଣୁଆ ନେତାଙ୍କ ଠାରୁ ଏ ସମ୍ପର୍କିତ କୌଣସି ସ୍ପଷ୍ଟିକରଣ ମିଳିନାହିଁ। କିନ୍ତୁ ତାଙ୍କ ପୁଅ ଶୁଭ୍ରାଂଶୁ ଏହାକୁ ଖଣ୍ଡନ କରିଛନ୍ତି। ଗତ ସପ୍ତାହରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପୁତୁରା ଅଭିଷେକ ହସ୍ପିଟାଲରେ ପହଞ୍ଚି ମୁକୁଲଙ୍କ ପତ୍ନୀଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଥିଲେ। ଏହାର ପର ଦିନ ହିଁ ମୁକୁଲଙ୍କ ସହ ଫୋନ ଜରିଆରେ କଥା ହୋଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି।
