ବମ୍ବେ: ନିକଟରେ ବିବାହ ବନ୍ଧନରେ ଆବଦ୍ଧ ହୋଇଛନ୍ତି ଅଭିନେତ୍ରୀ ୟାମି ଗୌତମ। ହିମାଚଳ ପ୍ରଦେଶରେ ଆୟୋଜିତ ଉତ୍ସବରେ ପରିବାରଲୋକଙ୍କ ଗହଣରେ ଆଦିତ୍ୟ ଧରଙ୍କ ହାତ ଧରିଥିଲେ ସେ। ଉଭୟ ଅନେକ ସମୟ ଧରି ନିଜର ସମ୍ପର୍କକୁ ଲୋକଲୋଚନକୁ ଆଣି ନ ଥିବାରୁ ପ୍ରଶଂସକ ହଠାତ୍ ଚମକି ପଡ଼ିଥିଲେ। ଏପରିକି ତାଙ୍କର ବିବାହ ଫଟୋ ଶେୟାର ହେବା ମାତ୍ରକେ ଭାଇରାଲ ହୋଇଥିଲା। ସମସ୍ତଙ୍କୁ ୟାମିଙ୍କ ବ୍ରାଇଡାଲ ଲୁକ୍ ବେଶ୍ ଆକର୍ଷିତ କରିଥିଲା।
ବିବାହ ପାଇଁ ନାଲି ରଙ୍ଗକୁ ବାଛିଥିଲେ ୟାମି। ସେ ତାଙ୍କର ମା’ଙ୍କ ୩୩ ବର୍ଷ ପୁରୁଣା ଶାଢ଼ିକୁ ବିବାହ ପୋଷାକ ଭାବେ ବାଛିଥିଲେ। ଉକ୍ତ ପାରମ୍ପରିକ ଶାଢ଼ିରେ ସୁନାର ସୁନ୍ଦର କାମ କରାଯାଇଥିଲା। ଦେଖିବାକୁ ସାଧାସାଧା ଲାଗିଲେ ହେଁ ୟାମି ଏହାକୁ ଫ୍ଲୋରାଲ୍ ବ୍ଲାଉଜ୍ ସହ ମିଶାଇ ପିନ୍ଧିଥିଲେ। ଏହାଛଡ଼ା ସେ ଆଇ ମା’ ଦେଇଥିବା ଲାଲ ରଙ୍ଗର ଓଢ଼ଣୀ ମୁଣ୍ଡରେ ପକାଇଥିଲେ। ସୁନାର ହାର, ମଥାମଣି ଏବଂ ଚୁଡ଼ି ପିନ୍ଧିବା ପରେ ୟାମି କୌଣସି ଅପସରୀଙ୍କଠାରୁ କମ୍ ଲାଗୁ ନ ଥିଲେ।
ତେବେ ବିବାହ ଭଳି ସ୍ମରଣୀୟ ଦିନ ଲାଗି ୟାମି ମା’ଙ୍କ ଶାଢ଼ିକୁ ବାଛିଥିବାକୁ ଅନେକ ପ୍ରଶଂସା କରୁଛନ୍ତି। ଏଥିରୁ ସେ ମାଙ୍କୁ କେତେ ଭଲ ପାଆନ୍ତି, ପରିବାରକୁ କେତେ ଗୁରୁତ୍ୱ ଦିଅନ୍ତି ଜଣାପଡ଼ୁଛି ବୋଲି ଚର୍ଚ୍ଚା ହେଉଛି।
