ନୂଆଦିଲ୍ଲୀ: ସାଥୀଙ୍କୁ ନିଜର ମନ କଥା କହିବା ଏବଂ ପରେ ବିବାହ ପାଇଁ ପ୍ରପୋଜ କରିବାର ଭିନ୍ନ ଭିନ୍ନ ଉପାୟ ଆପଣ ଦେଖିଥାଇପାରନ୍ତି। କିଏ ଫୁଲତୋଡ଼ା ଦେଇ ପ୍ରପୋଜ କରେ ତ କିଏ କେକ୍ରେ ମୁଦି ରଖି ସାଥୀଙ୍କୁ ବିବାହ ପ୍ରସ୍ତାବ ଦେଇଥାନ୍ତି। ହେଲେ ଆମେ ଆପଣଙ୍କୁ ଏଭଳି ଜଣେ ଯୁବକଙ୍କ କାହାଣୀ ବିଷୟରେ କହିବୁ ଯିଏ ଅତି ନିଆରା ଢ଼ଙ୍ଗରେ ନିଜର ପ୍ରେମିକାଙ୍କୁ ବିବାହ ପ୍ରସ୍ତାବ ଦେଇଛନ୍ତି।
ପିଏଚ୍ଡି କରୁଥିବା ହନାନଙ୍କୁ ଗୁପ୍ଚୁପ୍ ବହୁତ ପସନ୍ଦ। ଯେଉଁ ସମୟରେ ବି ତାଙ୍କୁ ଗୁପ୍ଚୁପ୍ ଦେଲେ ସେ ଖାଇ ନେଇଥାନ୍ତି। ଏହାକୁ ନଜରରେ ରଖି ତାଙ୍କ ପ୍ରେମିକ ଗୁପ୍ଚୁପ୍ରେ ମୁଦି ଭର୍ତ୍ତି କରି ପ୍ରେମ ନିବେଦନ କରିଥିଲେ। ଏହା ଦେଖି ହନାନ ଖୁସିରେ ଆତ୍ମହରା ହୋଇଯାଇଥିଲେ। କାରଣ ସେ ଏଭଳି କଥାକୁ କେବେ ବି କଳ୍ପନା କରି ନ ଥିଲେ।
ଏନେଇ ଟୁଇଟ୍ କରି ହନାନ ଲେଖିଥିଲେ, ମୁଁ ଗୁପ୍ଚୁପ୍କୁ ବା କିଭଳି ମନା କରିପାରିବି। ଏହାଦେଖି ସେ ପ୍ରସ୍ତାବରେ ହଁ ଭରିଥିବା ସ୍ପଷ୍ଟ ହୋଇଥିଲା। ଏହି ଟୁଇଟ୍ ଭାଇରାଲ ହେବା ପରେ ଲୋକମାନେ ଉଭୟଙ୍କୁ ଶୁଭେଚ୍ଛା ଜଣାଉଛନ୍ତି।
