ଗୋପାଳଗଞ୍ଜ,୧୨।୬: ଖାଇବାକୁ ନେଇ ବରଯାତ୍ରୀଙ୍କ ମଧ୍ୟରେ ମାରପିଟ୍ ଯୋଗୁ ୧୧ ଜଣ ଆହତ ହୋଇଛନ୍ତି। ଆହତଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ଏହି ଘଟଣା ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ବିହାରର ଗୋପାଳଗଞ୍ଜ ଜିଲାରେ ଏଭଳି ଅଭାବନୀୟ ଘଟଣା ଘଟିଛି। ସ୍ଥାନୀୟ ଭୋରେ ଥାନା ଅଞ୍ଚଳର ସିସଇ ଟୋଲା ଭଟଓ୍ବଲିଆଠାରେ ଏଭଳି ଘଟଣା ଘଟିଛି। ବରଯାତ୍ରୀମାନଙ୍କ ମଧ୍ୟରେ ଖଣ୍ଡେ ମାଛ ପିସ୍କୁ ନେଇ ଟଣାଓଟରା ପରେ ଏହା ମାରପିଟ୍ରେ ପରିଣତ ହୋଇଥିଲା। ଶେଷରେ ୧୧ ଜଣ ଆହତ ହେବା ସହିତ ବହୁ ବରଯାତ୍ରୀ ଖଣ୍ଡିଆ ଖାବରା ହୋଇଥିଲେ। ଗୁରୁବାର ଛଟୁ ଗୋଣ୍ଡେଙ୍କ ବିବାହରେ ଏଭଳି ଘଟିଛି। ମାଛ ମୁଣ୍ଡ ଏବଂ ଭଲ ମାଛ ଖଣ୍ଡ ପାଇବା ପାଇଁ ଗଣ୍ଡଗୋଳ ହୋଇଥିଲା। ଶୁକ୍ରବାର ଆହତଙ୍କୁ ଭୋରେ ହସ୍ପିଟାଲରେ ଭର୍ତ୍ତି କରାଯାଇଛି। ପୋଲିସ ପକ୍ଷରୁ ଘଟଣାର ତଦନ୍ତ ଜାରି ରହିଛି।
