ରାୟଗଡ଼ା ଅଫିସ/ଗୁଣପୁର,୧୯ା୬: ଗଞ୍ଜାମ, କୋରାପୁଟ ସମେତ ରାୟଗଡ଼ା ଜିଲାରେ ୧୭ ତାରିଖରୁ ୪ର୍ଥ ପର୍ଯ୍ୟାୟ ଜାତୀୟ ସେରୋ ସର୍ଭେ ଆରମ୍ଭ ହୋଇଥିଲା। ରାୟଗଡ଼ା ଜିଲାରେ ଶନିବାର ନମୁନା ସଂଗ୍ରହ ଶେଷ ହୋଇଛି। ୩ ଦିନରେ ଜିଲାରୁ ୫୦୦ ରକ୍ତ ନମୁନା ସଂଗ୍ରହ ହୋଇଛି। ଜିଲାର ୧୦ କ୍ଲଷ୍ଟର ସମେତ ଜିଲା ମୁଖ୍ୟ ଚିକିତ୍ସାଳୟରୁ ଏହି ରକ୍ତ ନମୁନା ସଂଗ୍ରହ ହୋଇଛି।
ସୂଚନାଯୋଗ୍ୟ, କେତେଜଣଙ୍କ ଶରୀରରେ କରୋନା ଆଣ୍ଟିବଡି ତଥା ଇମୁନୋଗ୍ଲୋବିନ୍-ଜି ଓ ଇମୁନୋଗ୍ଲୋବିନ୍-ଏମ୍ର ପରିମାଣ କେତେ ରହିଛି ତାହା ଜାଣିବା ନିମନ୍ତେ ଶିଶୁ, ବୟସ୍କ ଏବଂ ୨ଟି ଡୋଜ୍ ଟିକା ନେଇଥିବା ବ୍ୟକ୍ତିଙ୍କ ରକ୍ତ ନମୁନା ପରୀକ୍ଷା କରାଯିବ। ଏଥିନିମନ୍ତେ ଭୁବନେଶ୍ୱରସ୍ଥିତ ଆଇସିଏମ୍ଆର୍-ଆର୍ଏମ୍ଆର୍ସି ପକ୍ଷରୁ ୩ ଦିନ ନମୁନା ସଂଗ୍ରହ କରାଯାଇଥିଲା। ଏହି ନମୁନା ପୁନେସ୍ଥିତ ଆଇସିଏମ୍ଆର୍ରେ ପରୀକ୍ଷା କରାଯିବ। ବୈଜ୍ଞାନିକ ଡା. ଅଞ୍ଜନ ବିଶୋୟୀ ୧୧ ଜଣିଆ ଟିମ୍ ଶନିବାର ରାୟଗଡ଼ା ଜିଲାର ଶେଷଖାଲର ରାଣାଗୁଡ଼ା, ରାୟଗଡ଼ା ପୌରାଞ୍ଚଳ ୧୦ ନଂ ଓ୍ବାର୍ଡ, ପଦ୍ମପୁର ବ୍ଲକ୍ର ଜାତିଲି ଗ୍ରାମ ଏବଂ ଗୁଣପୁର ବ୍ଲକ୍ ମରମା ପଞ୍ଚାୟତର ଦୁର୍ଗମ ପାରିଡ଼ି ଗ୍ରାମରୁ ନମୁନା ସଂଗ୍ରହ କରାଯାଇଥିଲା। ଏହି ସର୍ଭେରେ ୬ରୁ ୯ ବର୍ଷର ଶିଶୁ, ୯ ରୁ ୧୭ ବର୍ଷର କିଶୋର ଏବଂ ବୟସ୍କଙ୍କୁ ମଧ୍ୟ ସାମିଲ କରାଯାଇଥିଲା। ୧୦ କ୍ଲଷ୍ଟରରୁ ୪୦ ଲେଖାଏ ୪୦୦ ନମୁନା ଏବଂ ଅନ୍ୟ ୧୦୦ ନମୁନା ସ୍ବାସ୍ଥ୍ୟକର୍ମୀଙ୍କଠାରୁ ସଂଗ୍ରହ କରାଯାଇଛି।
