ସାଇ ପାଓଲୋ, ୨୦।୬(ଏ.ପି.)- କୋପା ଆମେରିକା ଫୁଟ୍ବଲ ଟୁର୍ନାମେଣ୍ଟର ଏକ ମ୍ୟାଚରେ ଆର୍ଜେଣ୍ଟିନା ୧-୦ ଗୋଲରେ ଉରୁଗୁଏକୁ ପରାସ୍ତ କରିଛି। ଫଳରେ ଲିଓନେଲ ମେସିଙ୍କ ଦଳ ଗ୍ରୁପ୍ ‘ଏ’ରେ ଚିଲି ସମକକ୍ଷ ୪ ପଏଣ୍ଟ ପାଇଛି। ତେବେ ଚିଲି ପ୍ରଥମ ଏବଂ ଆର୍ଜେଣ୍ଟିନା ଦ୍ୱିତୀୟ ସ୍ଥାନରେ ରହିଛି। ମ୍ୟାଚର ୧୩ତମ ମିନିଟରେ ମେସିଙ୍କ କ୍ରସ୍ ପାସ୍କୁ ହେଡ୍ ଜରିଆରେ ଗୋଲରେ ପରିଣତ କରିଥିଲେ ମିଡ୍ଫିଲ୍ଡର ଗୁଇଡୋ ରୋଡ୍ରିଗ୍ବେଜ। ଶେଷରେ ଏହା ନିର୍ଣ୍ଣାୟକ ହୋଇଥିଲା। ଆର୍ଜେଣ୍ଟିନା ପୂର୍ବରୁ ଚିଲି ବିପକ୍ଷ ମ୍ୟାଚକୁ ୧-୧ ଗୋଲରେ ଡ୍ର ରଖିଥିଲା। ମେସିଙ୍କ ଦଳ ଏହାର ପରବର୍ତ୍ତୀ ଲିଗ୍ ମ୍ୟାଚରେ ପାରାଗୁଏକୁ ଭେଟିବ। ନକ୍ଆଉଟର ପ୍ରାରମ୍ଭିକ ପର୍ଯ୍ୟାୟରେ ବ୍ରାଜିଲ ବିପକ୍ଷ ମୁକାବିଲାକୁ ଏଡ଼ାଇବାକୁ ହେଲେ ଆଗାମୀ ମ୍ୟାଚରେ ଆର୍ଜେଣ୍ଟିନାକୁ ବିଜୟ ହାସଲ କରିବାକୁ ପଡ଼ିବ।
ବ୍ରେରେଟନଙ୍କ ଗୋଲରେ ଚିଲି ବିଜୟୀ
ଇଂଲିଶ୍ମ୍ୟାନ ବେନ୍ ବ୍ରେରେଟନଙ୍କ ଗୋଲ ବଳରେ ଚିଲି କୋପା ଆମେରିକା ଫୁଟ୍ବଲ ଟୁର୍ନାମେଣ୍ଟରେ ବୋଲିଭିଆକୁ ପରାସ୍ତ କରିଛି। ଇଂଲଣ୍ଡର ଷ୍ଟୋକ୍ରେ ଜନ୍ମିତ ୨୨ ବର୍ଷୀୟ ବ୍ରେରେଟନ ମ୍ୟାଚର ୧୦ମ ମିନିଟରେ ଏହି ଗୋଲଟି ଦେଇଥିଲେ।ଏଡୁଆର୍ଡୋ ଭର୍ଗାସଙ୍କ ପାସ୍କୁ ସେ ଗୋଲରେ ପରିଣତ କରିଥିଲେ। ବ୍ରେରେଟନଙ୍କ ମା’ ଜଣେ ଚିଲି ଅଧିବାସୀ। ଶୁକ୍ରବାର କୋପା ଆମେରିକାର ପରିଚାଳନା ସଂସ୍ଥା କନ୍ମେବୋଲ ପକ୍ଷରୁ ବୋଲିଭିଆର ଟପ୍ ସ୍କୋରର ମାର୍ସେଲୋ ମାର୍ଟିନ୍ସଙ୍କୁ ସସ୍ପେଣ୍ଡ କରାଯାଇଥିଲା। କୋପା ଆମେରିକା ଆୟୋଜକଙ୍କୁ ସମାଲୋଚନା କରିବାରୁ ତାଙ୍କୁ ଦଣ୍ଡ ସ୍ବରୂପ ସସ୍ପେଣ୍ଡ କରାଯିବା ସହ ୨୦,୦୦୦ ଆମେରିକୀୟ ଡଲାର ଜରିମାନା କରାଯାଇଥିଲା। ଚିଲି ଏହାର ପରବର୍ତ୍ତୀ ମ୍ୟାଚରେ ଉରୁଗୁଏକୁ ଭେଟିବ।
