ମୁମ୍ବାଇ,୨୬।୬: ଅଗଷ୍ଟ ୪ରୁ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ ପୂର୍ବରୁ ଟିମ୍ ଇଣ୍ଡିଆ ହାତରେ ପ୍ରାୟ ୪୦ ଦିନ ରହିଛି। ଏହି ସମୟ ମଧ୍ୟରେ ଦୁଇଟି ଚାରି ଦିନିଆ ଅଭ୍ୟାସ ମ୍ୟାଚ୍ ଖେଳିବାକୁ ଚାହୁଁଛି ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ। ଏଥି ନେଇ ଟିମ୍ ମ୍ୟାନେଜମେଣ୍ଟର ଅନୁରୋଧ ପରେ ଇସିବି ସହ ଆଲୋଚନା କରିଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)।
ଦୁଇଟି ଓ୍ବାର୍ମ ଅପ୍ ମ୍ୟାଚ୍ ମଧ୍ୟରୁ ଇଂଲଣ୍ଡ ଲାୟନ୍ସ (ସେମାନଙ୍କ ଏ’ ଦଳ) ସହ ଗୋଟିଏ ମ୍ୟାଚ୍ ଖେଳିବା ସ୍ପଷ୍ଟ ହୋଇଛି। ଅନ୍ୟ ଓ୍ବାର୍ମ ଅପ୍ ମ୍ୟାଚ୍ କେଉଁ ଦଳ ବିପକ୍ଷରେ ଖେଳାଯିବ ତାହା ଜଣା ପଡ଼ିନାହିଁ। ଉଲ୍ଲେଖଥାଉ କି, ଅଭ୍ୟାସ ଅଭାବ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ଭାରତୀୟ ଦଳକୁ ଖୁବ୍ ମହଙ୍ଗା ପଡ଼ିଥିଲା। ପରାଜୟ ପରେ ଲଣ୍ଡନରେ ପହଞ୍ଚିଛି ଭାରତୀୟ ଦଳ। ଓ୍ବାର୍ମ ଅପ୍ ମ୍ୟାଚ୍ ପର୍ଯ୍ୟନ୍ତ ଦଳୀୟ ଖେଳାଳିମାନେ ସେଠାରେ ରହିବେ।
