ବାଲେଶ୍ୱର ଅଫିସ,୨୬।୬: ବାଲେଶ୍ୱର ସହର ଆଇଟିଆଇସ୍ଥିତ ଆର୍ଟ କଲେଜର ଜଣେ ଯୁକ୍ତ ୨ ଛାତ୍ରୀଙ୍କୁ ଅଧ୍ୟାପକ ଅସଦାଚରଣ କରିଥିବା ନେଇ ସୋସିଆଲ ମିଡ଼ିଆରେ ଭିଡ଼ିଓ ଭାଇରାଲ ହୋଇଥିଲା। ଏନେଇ ଛୋତ୍ରୀଙ୍କ ବାପା ସଦର ଥାନାରେ ଅଭିଯୋଗ କରିଥିଲେ। ସଦର ଥାନା ପୋଲିସ ପୋକ୍ସୋ ଆକ୍ଟରେ ଏକ ମାମଲା (ନଂ.୨୨୩/୨୧) ରୁଜୁ କରି ଅଭିଯୁକ୍ତ ଅଧ୍ୟାପକଙ୍କୁ ଗିରଫ କରି ଶନିବାର କୋର୍ଟ ଚାଲାଣ କରିଛି।
କରୋନା ପାଇଁ କଲେଜ ବନ୍ଦ ଥିବା ବେଳେ ଗତ ୬ମାସ ପୂର୍ବରୁ ଇତିହାସ ଅଧ୍ୟାପକ ଶଶାଙ୍କ ଶେଖର ଦାସ ମହାବିଦ୍ୟାଳୟରେ ଗ୍ରୁପ ଟ୍ୟୁଶନ କରିବା ସହ ଘରକୁ ଛାତ୍ରୀଛାତ୍ରଙ୍କୁ ଡାକି ବ୍ୟକ୍ତିଗତ ଭାବେ ଟ୍ୟୁଶନ କରୁଥିଲେ। ଜଣେ ଯୁକ୍ତ ୨ ଛାତ୍ରୀଙ୍କୁ ଏକୁଟିଆ ଡାକି ଉକ୍ତ ଅଧ୍ୟାପକ ଟ୍ୟୁଶନ କରୁଥିବା ବେଳେ ତାଙ୍କ ସହ ଅସଦାଚରଣ କରିଥିବା ମହାବିଦ୍ୟାଳୟ କର୍ତ୍ତୃପକ୍ଷଙ୍କ ନିକଟରେ ଛାତ୍ରୀ ଓ ପରିବାର ପକ୍ଷରୁ ଅଭିଯୋଗ କରାଯାଇଥିଲା। ଏନେଇ ମହାବିଦ୍ୟାଳୟ କର୍ତ୍ତୃପକ୍ଷ ତାଙ୍କୁ ନିଲମ୍ବିତ କରିଥିଲେ। କିନ୍ତୁ ଅସଦାଚରଣର ଭିଡ଼ିଓ କିଛିଦିନ ପୂର୍ବରୁ ଭାଇରାଲ ହେବାରୁ ଛାତ୍ରୀଙ୍କ ବାପା ଏନେଇ ଥାନାରେ ପୁଣି ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ଅଧ୍ୟାପକଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ସଦର ଥାନା ଅଧିକାରୀ ଅଶୋକ ନାୟକ ପ୍ରକାଶ କରିଛନ୍ତି।
