ନୂଆଦିଲ୍ଲୀ,୧୬।୬: ‘ଜୟଶ୍ରୀ ରାମ’ ନ କହିବାରୁ ମୁସଲିମ ବୃଦ୍ଧଙ୍କୁ ମାଡ଼ ମରାଯିବା ଘଟଣା ବୁଧବାର ନୂଆ ମୋଡ଼ ନେଇଛି। ଟୁଇଟର ଓ ଜର୍ନାଲିଷ୍ଟ, କଂଗ୍ରେସ ନେତାଙ୍କ ସମେତ ୮ ଜଣଙ୍କ ବିରୋଧରେ ମିଥ୍ୟା ଖବର ପ୍ରଚାର ମାମଲା ଦାୟର କରିଛି ଗାଜିଆବାଦ ପୋଲିସ। ଏହି ଘଟଣାକୁ ନେଇ ସାମ୍ପ୍ରଦାୟିକତା ମତଭେଦ ସୃଷ୍ଟି କରିବାକୁ ଚେଷ୍ଟା କରାଯାଉଥିବା ପୋଲିସ ପକ୍ଷରୁ କୁହାଯାଇଛି। ହେଲେ ୟୁପି ପୋଲିସ ମିଛ କହୁଛି ବୋଲି କହିଛନ୍ତି ପୀଡ଼ିତ ଅବଦୁଲ ସମଦଙ୍କ ପୁଅ।
ପୋଲିସ କହିବା ଅନୁଯାୟୀ, ପୀଡ଼ିତ ଅବଦୁଲ କିଛି ଲୋକଙ୍କୁ ଆମଲେଟ ବିକି ଥିଲେ। ଏହା ସେମାନଙ୍କୁ ପସନ୍ଦ ଆସି ନ ଥିଲା। ଏଣୁ ୬ ଜଣ ଗ୍ରାହକ ଅବଦୁଲଙ୍କୁ ଆକ୍ରମଣ କରିଥିଲେ। ଆକ୍ରମଣକାରୀଙ୍କ ମଧ୍ୟରେ ସାମିଲ ଥିଲେ ଉଭୟ ହିନ୍ଦୁ ଓ ମୁସଲିମ ସମ୍ପ୍ରଦାୟର ବ୍ୟକ୍ତିମାନେ। ଗାଜିଆବାଦ ପୋଲିସ ସ୍ପଷ୍ଟିକରଣ ଦେବା ପରେ ମଧ୍ୟ ମିଥ୍ୟା ତଥ୍ୟ ପ୍ରଚାର କରୁଥିବା ବ୍ୟକ୍ତିଙ୍କ ବିରୋଧରେ ଟୁଇଟର କୌଣସି କାର୍ଯ୍ୟାନୁଷ୍ଠାନ ନେଉ ନାହିଁ। ଏଣୁ ଟୁଇଟର ବିରୋଧରେ ମଧ୍ୟ ଏଫ୍ଆଇଆର ରୁଜୁ ହୋଇଛି।
ତେବେ ପୀଡ଼ିତ ଅବଦୁଲଙ୍କ ପୁଅ ବାବଲୁ ସେଫି ଦାବି କରିଛନ୍ତି ଯେ, ପୋଲିସ ମିଛ କହୁଛି। ମୋ ବାପା ଆମଲେଟ ବିକନ୍ତି ନାହିଁ। ଏହି ବ୍ୟବସାୟ ସହ ଆମ ପରିବାରର କେହି ଜଡ଼ିତ ନୁହନ୍ତି। ପୋଲିସ ସତ କହୁ ନାହିଁ। ଆମ ଘଟଣାର ପରଦିନ ଅର୍ଥାତ ୬ ତାରିଖରେ ପୋଲିସକୁ ସମ୍ପୂର୍ଣ୍ଣ ତଥ୍ୟ ଦେବା ସହ ମାମଲା ଦାୟର କରିଥିଲୁ।
ଉଲ୍ଲେଖଯୋଗ୍ୟ, ଟୁଇଟର ଓ ୮ ଜଣଙ୍କ ବିରୋଧରେ ୧୫୩ (ଦଙ୍ଗାକୁ ପ୍ରୋତ୍ସାହିତ କରିବା), ୧୫୩ କ (ଦୁଇ ସାମ୍ପ୍ରଦାୟିକ ଗୋଷ୍ଠୀକୁ ଉତ୍ତେଜିତ କରିବା), ୨୯୫ କ (ଧାର୍ମୀକ ଭାବନାକୁ ଆଘାତ କଲା ଭଳି କାର୍ଯ୍ୟ), ୫୦୫, ୧୨୦ ଖ(ଅପରାଧିକ ଷଡ଼ଯନ୍ତ୍ର) ଓ ୩୪ (ସାଧାରଣ ଉଦ୍ଦେଶ୍ୟରେ କାର୍ଯ୍ୟ କରିବା) ଭଳି ସଙ୍ଗିନ ଦଫାରେ ମାମଲା ଦାୟର କରାଯାଇଛି।
