ହାଇଦ୍ରାବାଦ୍,୯।୬: କରୋନା ମହାମାରୀ ଭୂତାଣୁ ବିରୋଧରେ ଭାକ୍ସିନ୍ ପ୍ରସ୍ତୁତ କରିଥିବା ଭାରତ ବାୟୋଟେକ୍ର ହାଇଦ୍ରାବାଦ୍ ସ୍ଥିତ କ୍ୟାମ୍ପସ୍ ଏବେ କେନ୍ଦ୍ରୀୟ ସୁରକ୍ଷାକର୍ମୀଙ୍କ ଛାଉଣୀରେ ପରିଣତ ହୋଇଛି। ଦେଶରେ କରୋନା ବିରୋଧରେ ଜାରି ରହିଥିବା ଲଢ଼େଇରେ ଭାରତ ବାୟୋଟେକ୍ର କୋଭାକ୍ସିନ୍ ପ୍ରଭାବଶାଳୀ ସାବ୍ୟସ୍ତ ହୋଇଛି। ତେଣୁ କ୍ୟାମ୍ପସ୍ ଉପରେ ଆତଙ୍କବାଦୀ ଆକ୍ରମଣର ଆଶଙ୍କାକୁ ଦୃଷ୍ଟିରେ ରଖି ବହୁସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ତେଲଙ୍ଗାନାର ଶାମିରପେଟ୍ ଅଞ୍ଚଳର ଜିନୋମ୍ ଭ୍ୟାଲିରେ ଭାରତ ବାୟୋଟେକ୍ର ପ୍ଲାଣ୍ଟ୍ର କ୍ୟାମ୍ପସ୍ରେ ସିଆଇଏସ୍ଏଫ୍ କମାଣ୍ଡୋଙ୍କ ସହିତ ଅନ୍ୟ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି। ସେହିପରି ହାଇଦ୍ରାବାଦ୍ରେ ପାରାମିଲିଟାରୀ ଫୋର୍ସର ୬୪ ଟି ଦଳକୁ ସୁରକ୍ଷା ଦାୟିତ୍ୱରେ ନିୟୋଜିତ କରାଯାଇଛି। କେନ୍ଦ୍ରୀୟ ସ୍ବରାଷ୍ଟ୍ର ମନ୍ତ୍ରଣାଳୟ ନିର୍ଦ୍ଦେଶରେ ସୁରକ୍ଷାକର୍ମୀଙ୍କୁ କ୍ୟାମ୍ପସ୍ରେ ମୁତୟନ କରାଯାଇଛି। ଭାରତ ବାୟୋଟେକ୍ର କ୍ୟାମ୍ପସ୍ରେ ବାହାର ଲୋକଙ୍କ ଯିବା ଆସିବା ଉପରେ ମଧ୍ୟ କଡ଼ା କଟକଣା ଜାରି ହୋଇଥିବା ସିଆଇଏସ୍ଏଫ୍ର ଡିଆଇଜି ଅନୀଲ ପାଣ୍ଡେ ସୂଚନା ଦେଇଛନ୍ତି।
