ଉଦଳା,୧୬ା୬: ମାସ୍କ ପିନ୍ଧିବାକୁ ତାଗିଦ୍ କରିବାରୁ ମୟୂରଭଞ୍ଜ ଜିଲା ଉଦଳା ଥାନା ଏସ୍ଆଇଙ୍କୁ ଜଣେ ଜେଲ୍ ଓ୍ବାର୍ଡର ଆକ୍ରମଣ କରିଥିବା ଅଭିଯୋଗ ହୋଇଛି। ଏନେଇ ପୋଲିସ ଏକ ମାମଲା(ନଂ.୧୯୪/୨୧) ରୁଜୁ କରି ସମ୍ପୃକ୍ତ ଜେଲ ଓ୍ବାର୍ଡରଙ୍କୁ ଅଟକ ରଖିଛି। ଅନ୍ୟପକ୍ଷେ ପୋଲିସ ଏସ୍ଆଇ ଦୁର୍ବ୍ୟବହାର ପ୍ରଦର୍ଶନ ସହ ହତ୍ୟା ଧମକ ଦେଇଥିବା ନେଇ ଜେଲ୍ ଓ୍ବାର୍ଡରଙ୍କ ସ୍ତ୍ରୀ ପାଲଟା ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ମଙ୍ଗଳବାର ରାତିରେ ଥାନା କର୍ମଚାରୀ ପାଟ୍ରୋଲିଂ କରୁଥିବା ବେଳେ ସ୍ଥାନୀୟ ଅରବିନ୍ଦ ସ୍କୁଲ ନିକଟରେ ବାରିପଦା ଜେଲର ୱାର୍ଡର ମନୋଜ କୁମାର କୁଅଁରଙ୍କ ସମେତ ଅନ୍ୟ ୩ଜଣ ଛିଡ଼ା ହୋଇଥିଲେ। ସେମାନେ ମାସ୍କ ପିନ୍ଧି ନ ଥିବାରୁ ପାଟ୍ରୋଲିଂ ଦାୟିତ୍ୱରେ ଥିବା ଏସ୍ଆଇ ଶଶୀଭୂଷଣ ପରିଡ଼ା ତାଗିଦ୍ କରିଥିଲେ। ଏଥିରେ ଉତ୍କ୍ଷିପ୍ତ ହୋଇ ଜେଲ୍ ୱାର୍ଡର ମନୋଜ ପୋଲିସ ଏସ୍ଆଇ ପରିଡ଼ାଙ୍କୁ ଠେଲାପେଲା ସହ ଆକ୍ରମଣ କରିଥିଲେ। ପୋଲିସ୍ କର୍ମଚାରୀମାନେ ତାଙ୍କୁ କାବୁ କରିବାକୁ ଚେଷ୍ଟା କରିବା ବେଳେ ସେ ଗାଳିଗୁଲଜ କରିଥିଲେ।
