ଘର ବାହାରେ ତାଲା ଝୁଲୁଥିଲା ବୋଲି ଚିମିନି ବାଟଦେଇ ପଶୁଥିଲେ ଯୁବତୀ; ପାଇପ୍‌ରେ ଏମିତି ଫସିଲେ ଯେ…

ନୂଆଦିଲ୍ଲୀ: ଅନେକ ଥର ଲୋକମାନେ ନିଜ ଘର କିମ୍ବା କାର୍‌ର ଚାବି ଏଣେତେଣେ ରଖି ଭୁଲିଯିବା ଯୋଗୁ ସେମାନଙ୍କୁ ଅସୁବିଧାର ସମ୍ମୁଖୀନ ହୋଇଥାନ୍ତି। ଏଭଳି ପରିସ୍ଥିତିରେ କିଛି ଲୋକ ଘରର ତାଲା ଭାଙ୍ଗିଥାନ୍ତି ନହେଲେ ନକଲି ଚାବି ତିଆରି କରିଥିବା ଲୋକଙ୍କୁ ଡାକିଥାନ୍ତି। ହେଲେ ଆଜି ଆମେ ଆପଣଙ୍କୁ ଏଭଳି ଏକ ଘଟଣା ବିଷୟରେ କହିବାକୁ ଯାଉଛୁ, ଯାହାକୁ ଜାଣିିବା ପରେ ଆପଣ ବିଶ୍ୱାସ ନ କରିପାରନ୍ତି। କେହି ଏଭଳି କେମିତି କରିପାରିବେ ବୋଲି ଆପଣ କହି ମଧ୍ୟ ପାରନ୍ତି।
ଘଟଣାଟି ଆମେରିକାର ନେଭାଡା ରାଜ୍ୟର। ଏଠାରେ ଜଣେ ଯୁବତୀଙ୍କ ଘରକୁ ଫେରିବା ପରେ ବାହାରୁ ତାଲା ପଡ଼ିଥିବା ଦେଖିଥିଲେ। ଚାବି ନ ଥିବାରୁ ଘରେ କିଭଳି ପଶିବେ ଚିନ୍ତା କରିଥିଲେ। ଅନ୍ୟ କୌଣସି ଉପାୟ ମୁଣ୍ଡକୁ ନ ଆସିବାରୁ ସେ ଚିମିନି ପଟ ଦେଇ ଘରକୁ ପଶିବାକୁ ସ୍ଥିର କରିଥିଲେ। ଏଥିଯୋଗୁ ତାଙ୍କ ଜୀବନ ବିପଦରେ ପଡ଼ିି ଯାଇଥିଲା। ଅଗ୍ନିଶମ ବାହିନୀ ଡାକିବା ପର୍ଯ୍ୟନ୍ତ କଥା ଯାଇଥିଲା। ଅଗ୍ନିଶମ କର୍ମଚାରୀମାନେ ପହଞ୍ଚି ଚିମିନି ଭିତରେ ଫସି ରହିଥିବା ଯୁବତୀଙ୍କୁ ଟାଣିକରି ଉଦ୍ଧାର କରିଥିଲେ।

କୁହାଯାଉଛି, ଯେତେବେଳେ ଯୁବତୀଜଣଙ୍କ ଚିମିନି ଦେଇ ଘର ଭିତରକୁ ପଶୁଥିଲେ, ସେତେବେଳେ ସେ ମଝି ପାଇପ୍‌ରେ ଫସି ଯାଇଥିଲେ। ପରେ ସେ ସାହାଯ୍ୟ ପାଇଁ ଚିତ୍କାର କରିଥିଲେ। ଏନେଇ ଅଗ୍ନିଶମ ବିଭାଗକୁ ସୂଚନା ଦିଆଯାଇଥିଲା। ଅଗ୍ନିଶମ କର୍ମଚାରୀମାନେ ସେଠାରେ ପହଞ୍ଚି ଯୁବତୀଙ୍କୁ ସୁରକ୍ଷିତ ଭାବେ ଉଦ୍ଧାର କରିବାରେ ସଫଳ ହୋଇଥିଲେ। ସୌଭାଗ୍ୟବଶତଃ ଯୁବତୀ ଗୁରୁତର ଆହତ ହୋଇ ନ ଥିଲେ।

ହେଣ୍ଡରସନ ଅଗ୍ନିଶମ ବିଭାଗ ନିଜ ଫେସବୁକ ପୃଷ୍ଠାରେ ଘଟଣା ନେଇ ସୂଚନା ଦେଇଛିି। ୧୮ ବର୍ଷୀୟ ଯୁବତୀଙ୍କୁ ହୋରିଜନ୍‌ ଏବଂ କଲେଜ୍‌ ଡ୍ରାଇଭ ନିକଟ ଏକ ଅଟ୍ଟାଳିକାର ଚିମିନି ମଧ୍ୟରୁ ରଶି ସାହାଯ୍ୟରେ ଉଦ୍ଧାର କରାଯାଇଛି। ଘର ବାହାରେ ତାଲା ଝୁଲି ଥିବାରୁ ସେ ଚିମିନି ଦେଇ ଘରେ ଭିତରକୁ ଯିବାକୁ ଚେଷ୍ଟା କରିଥିଲେ। ହେଲେ ପାଇପ୍‌ରେ ଫସି ଯାଇଥିଲେ। ତାଲିମପ୍ରାପ୍ତ ଅଗ୍ନିଶମ କର୍ମଚାରୀଙ୍କ ସହାୟତାରେ ତାଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବିଭାଗ ପକ୍ଷରୁ କୁହାଯାଇଛି।