କୋଲକତା,୧୮।୬: ପଶ୍ଚିମବଙ୍ଗର ବିଧାନସଭା ନିର୍ବାଚନରେ ନନ୍ଦିଗ୍ରାମ ଆସନରୁ ଭାଜପା ପ୍ରାର୍ଥୀ ଶୁଭେନ୍ଦୁ ଅଧିକାରୀଙ୍କଠାରୁ ହାରିଯାଇଥିଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ। ପରେ ସେ ଶୁଭେନ୍ଦୁ ଅଧିକାରୀଙ୍କ ବିଜୟ ବିରୋଧରେ କଲିକତା ହାଇକୋର୍ଟରେ ପହଞ୍ଚିଛନ୍ତି। ନନ୍ଦୀଗ୍ରାମରେ ସମଗ୍ର ନିର୍ବାଚନ ପ୍ରକ୍ରିୟାକୁ ଚ୍ୟାଲେଞ୍ଜ କରି ମମତା ହାଇକୋର୍ଟରେ ଏକ ପିଟିସନ ଦାଖଲ କରିଛନ୍ତି। ତେବେ କଲିକତା ହାଇକୋର୍ଟ ମମତା ବାନାର୍ଜୀଙ୍କ ଆବେଦନ ଉପରେ ଶୁଣାଣି ଜୁନ୍ ୨୪ ପର୍ଯ୍ୟନ୍ତ ସ୍ଥଗିତ ରଖିଛନ୍ତି।
ସୂଚନାଯୋଗ୍ୟ ଯେ, ବଙ୍ଗଳାର ଆଠଟି ପର୍ଯ୍ୟାୟରେ ଅନୁଷ୍ଠିତ ନିର୍ବାଚନ ପରେ ମେ ୨ରେ ଫଳାଫଳ ଘୋଷଣା କରାଯାଇଥିଲା। ଏଥିରେ ସମସ୍ତଙ୍କ ନଜର ରାଜ୍ୟର ହଟସିଟ୍ ନନ୍ଦିଗ୍ରାମ ଉପରେ ଥିଲା। ଫଳାଫଳ ଗଣତି ଦିନ ପ୍ରଥମେ ମମତା ନିଜ ପ୍ରତିଦ୍ୱନ୍ଦୀଙ୍କ ପାଖରୁ ୧୨୦୦ ଭୋଟରେ ବିଜୟୀ ହୋଇଥିଲେ ବୋଲି କୁହାଯାଇଥିଲା। ଏ ନେଇ ମମତା ଭୋଟରଙ୍କୁ ଧନ୍ୟବାଦ ମଧ୍ୟ ଦେଇ ସାରିଥିଲେ। ହେଲେ ଶୁଭେନ୍ଦୁଙ୍କ ଅନୁରୋଧ କ୍ରମେ ନିର୍ବାଚନ କମିଶନର ଆଉ ଥରେ ଭୋଟ ଗଣତି କରିଥିଲେ। ଏହାପରେ ଶୁଭେନ୍ଦୁ ଅଧିକାରୀଙ୍କ ଠାରୁ ମମତା ପରାସ୍ତ ହୋଇଥିବା ଘୋଷଣା କରିଥିଲେ ନିର୍ବାଚନ କମିଶନର। ପରେ ମମତା କହିଥିଲେ ନନ୍ଦିଗ୍ରାମରେ ଯାହା ହେଲା ଭୁଲି ଯାଅ। ନିର୍ବାଚନ କମିଶନ କେନ୍ଦ୍ରର ନିର୍ଦ୍ଦେଶ କ୍ରମେ ଭୋଟ ଗଣତରି ଜାଲିଆତି କରିଛି ବୋଲି ଦିଦି କହିଥିଲେ।
