କେହି ମାଲିକଙ୍କ ଘର କବାଟ ବାଡେଇଲେ ଛାତ ଉପରୁ ଥାଇ ଇଟା ଫିଙ୍ଗିଥାଏ ଏହି କୁକୁର; ଏବେ ଘଟିଲା କିଛି…

ପଶୁମାନଙ୍କ ମଧ୍ୟରେ ସବୁଠାରୁ ବିଶ୍ୱାସୀ କୁକୁର ବୋଲି କୁହାଯାଏ। କାରଣ ସେ ମାଲିକର ସୁରକ୍ଷା କରିବା ସହ ତାଙ୍କର ସବୁକଥା ଅକ୍ଷରେ ଅକ୍ଷରେ ପାଳନ କରିଥାଏ। ହେଲେ କିଛି ଲୋକ ଏଭଳି ଥାଆନ୍ତି ଯେଉଁମାନେ ପଶୁମାନଙ୍କ ଦ୍ୱାରା ଅନ୍ୟମାନଙ୍କୁ ଡରାଇଥାନ୍ତି। ନଚେତ ଅନ୍ୟର କ୍ଷତି କରିବାକୁ ଚେଷ୍ଟା କରିଥାନ୍ତି। ଦକ୍ଷିଣ ଆଫ୍ରିକାରେ ଏଭଳି ଏକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ଏସୀୟ ବଂଶୋଦ୍ଭବଙ୍କୁ କୁକୁର ସାହାଯ୍ୟରେ ଲୋକମାନଙ୍କ ଉପରେ ଇଟା ଫିଙ୍ଗିବାକୁ ନେଇ ଗିରଫ କରାଯାଇଛି।

ଯାହା ଜଣାପଡ଼ିଛି, ଘରର କବାଟ ଯିଏ ବି ଠକ୍‌ଠକ୍‌ କରିବ ତା’ ଉପରେ ଇଟା ଫିଙ୍ଗିବା ପାଇଁ ବ୍ୟକ୍ତିଜଣଙ୍କ ନିଜ କୁକୁରକୁ ଟ୍ରେନିଂ ଦେଇଥିଲେ। ଏଣୁ ଯିଏ ବି ତାଙ୍କ କବାଟ ବାଡାଏ, କୁକୁରଟି ଘରର ଛାତ ଉପରୁ ତାଙ୍କ ଉପରେ ଇଟା ଫିଙ୍ଗିଥାଏ। ଏହାଦ୍ୱାରା ଅନେକ ଆହତ ହୋଇଥିଲେ। ତେବେ ବ୍ୟକ୍ତି ଏକୁଟିଆ ରହିବାକୁ ପସନ୍ଦ କରନ୍ତି। କିଏ ବି ତାଙ୍କୁ ହଇରାଣ କରୁ ସେ ଚାହୁଁ ନ ଥିବା ଯୋଗୁ ଏଭଳି କରୁଥିବା କହିଛନ୍ତି। ତେବେ ଘଟଣାର ତଦନ୍ତ କରୁଥିବା ପୋଲିସ ଏହାକୁ କ୍ରୁରତା ବୋଲି କହିଛି।

କହିରଖୁଛୁ, କିଛିଦିନ ପୂର୍ବେ ଦିଲ୍ଲୀର ୟୁଟ୍ୟୁବର୍‌ ଗୌରବ ଶର୍ମା ଏକ କୁକୁର ପିଠିରେ ହିଲିୟମ ବେଲୁନ ବାନ୍ଧି ଉଡ଼ାଇ ଦେଇଥିଲେ। ଏଥିରେ କୁକୁର ଜୀବନ ବିପଦରେ ପଡ଼ିଥିଲା। ଘଟଣା ପରେ ପୋଲିସ ତାଙ୍କୁ ଗିରଫ କରିଥିଲା।