ରେଷ୍ଟୁରାଣ୍ଟରେ ୨୮୦୦ ଟଙ୍କାର ଖାଇଲେ, ହେଲେ ଓ୍ବେଟରଙ୍କୁ ୧୨ ଲକ୍ଷର ଟିପ୍‌ ଦେଲେ ବ୍ୟକ୍ତି; ବିଲ୍‌ ଦେଖି ଚକିତ ହେଲେ….

ନୂଆଦିଲ୍ଲୀ: କୁହାଯାଏ ସମସ୍ତେ ଟଙ୍କା ରୋଜଗାର କରନ୍ତି, ହେଲେ ଏହାକୁ ଖର୍ଚ୍ଚ କରିବାର ସାହସ ରଖିଥାନ୍ତି ଅଳ୍ପ କେତେଜଣ। ଏହିପରି ଜଣେ ବ୍ୟକ୍ତି ଏବେ ଚର୍ଚ୍ଚାରେ। କାରଣଟି ହେଲା ବ୍ୟକ୍ତିଜଣଙ୍କ ଏକ ରେଷ୍ଟୁରାଷ୍ଟରେ ଖାଇବାକୁ ଯାଇ ପ୍ରାୟ ୧୨ ଲକ୍ଷ ଟଙ୍କାର ଟିପ୍‌ ଦେଇଛନ୍ତି।

ଘଟଣାଟି ଆମେରିକାର ନ୍ୟୁ ହାମ୍ପସାୟାରର। ଏଠାରେ ଜଣେ ବ୍ୟକ୍ତି ଏକ ରେଷ୍ଟୁରାଣ୍ଟରେ ରାତ୍ରୀଭୋଜନ କରିବାକୁ ଯାଇଥିଲେ। ସେଠାରେ ସେ ଖାଦ୍ୟର ଅର୍ଡର ଦେଇଥିଲେ, ଯାହାର ବିଲ୍‌ ୩୭.୬୩ ଡଲାର ଆସିଥିଲା। ଏହା ଭାରତୀୟ ମୁଦ୍ରାରେ ପ୍ରାୟ ୨୮୦୦ ଟଙ୍କା ଅଟେ। ହେଲେ ଯେତେବେଳେ ଓ୍ବେଟର ବିଲ୍‌ ଆଣିଥିଲେ, ବ୍ୟକ୍ତିଜଣଙ୍କ ତାଙ୍କୁ ୧୬,୦୦୦ ଡଲାର ଟିପ୍‌ ଦେଇଥିଲେ। ଭାରତୀୟ ମୁଦ୍ରାରେ ଏହାର ପରିମାଣ ପ୍ରାୟ ୧୨ ଲକ୍ଷ ଟଙ୍କା ହେବ। ଓ୍ବେଟରଜଣଙ୍କ ତୁରନ୍ତ ବିଲ୍‌କୁ ଦେଖି ନ ଥିଲେ, କିନ୍ତୁ ଯେତେବେଳେ ଗ୍ରାହକଜଣଙ୍କୁ ତାଙ୍କୁ ସବୁ ଗୋଟିଏ ଜାଗାରେ ଖର୍ଚ୍ଚ ନ କରିବାକୁ କହିଥିଲେ, ସେତେବେଳେ ସେ ବିଲ୍‌କୁ ଭଲ ଭାବେ ଦେଖିଥିଲେ। ଏହା ଦେଖି କେବଳ ଯେ ଓ୍ବେଟର ତାହା ନୁହେଁ ରେଷ୍ଟୁରାଣ୍ଟ ମାଲିକ ମଧ୍ୟ ଚକିତ ହୋଇଯାଇଥିଲେ।

ପରେ ରେଷ୍ଟୁରାଣ୍ଟ ମାଲିକ ମାଇକେଲ ଜାରେଲା ଫେସବୁକ୍‌ରେ ଉକ୍ତ ବିଲ୍‌ର ଫଟୋ ଶେୟାର କରି ଗ୍ରାହକଙ୍କୁ ତାଙ୍କ ଉଦାରତା ପାଇଁ ଧନ୍ୟବାଦ ଜଣାଇଥିଲେ। ପ୍ରାରମ୍ଭରେ ସେ ଗ୍ରାହକ ଭୁଲରେ ଟଙ୍କା ଦେଇଥିବା କଥା ଭାବିଥିଲେ, ହେଲେ ତାଙ୍କୁ ପଚାରିବା ପରେ ସେ ଜାଣିକରି ଦେଇଥିବା କହିଥିଲେ। ସେ ଓ୍ବେଟରଙ୍କୁ ଆର୍ଥିକ ସାହାଯ୍ୟ କରିବାକୁ ଚାହୁଁଥିବା ଜଣାଇଥିଲେ। ଏବେ ଉକ୍ତ ବିଲ୍‌ଟି ବେଶ୍‌ ଭାଇରାଲ ହେଉଛି।