ବୁଗୁଡ଼ା,୧୭ା୬: ଗଞ୍ଜାମ ଜିଲା ବୁଗୁଡ଼ା ଥାନା ଅଞ୍ଚଳର ଜନୈକା କଲେଜ ଛାତ୍ରୀଙ୍କ ଅଶ୍ଳୀଳ ଫଟୋ ଭାଇରାଲ ହୋଇଥିବା ଅଭିଯୋଗ ହୋଇଛି। ଅଭିଯୋଗକୁ ଭିତ୍ତି କରି ଗୁରୁବାର ଜଣେ ଯୁବକଙ୍କୁ ଗିରଫ କରି ପୋଲିସ କୋର୍ଟ ଚାଲାଣ କରିଛି। ଗିରଫ ଯୁବକ ଜଣକ ହେଲେ ନୟାଗଡ଼ ଟାଉନର ସନ୍ତୋଷ କୁମାର ମହାରଣା। ଏନେଇ ବୁଗୁଡ଼ା ଥାନାରେ ଏକ ମାମଲା(ନଂ ୨୯୪/୨୧) ରୁଜୁ ହୋଇଛି।
ନୟାଗଡ଼ର ଏକ କଲେଜରେ ପଢୁଥିବା ବେଳେ ସନ୍ତୋଷଙ୍କ ସହ ଛାତ୍ରୀଙ୍କ ପ୍ରେମ ସମ୍ପର୍କ ଗଢି ଉଠିଥିଲା। ପ୍ରାୟ ଦେଢ଼ ମାସ ତଳେ ପରିବାର ଲୋକେ ଏହା ଜାଣିବା ପରେ ଝିଅକୁ ଗାଁକୁ ନେଇ ଆସିଥିଲେ। ନିକଟରେ ଝିଅକୁ ଅନ୍ୟତ୍ର ବିବାହ କରିବାକୁ ପରିବାର ଲୋକ ଠିକ୍ କରିଥିଲେ। ହେଲେ ଏହି ଖବର ସନ୍ତୋଷ ଜାଣି ରାଗରେ ଝିଅର କେତେକ ଅଶ୍ଳୀଳ ଫଟୋ ଭାଇରାଲ କରିଥିଲେ। ଏପରି କି ବିବାହ ଠିକ୍ ହୋଇଥିବା ଯୁବକଙ୍କ ନିକଟକୁ ଫଟୋ ପଠାଇଥିଲେ। ଏନେଇ ଛାତ୍ରୀଙ୍କ ମା’ ବୁଧବାର ବୁଗୁଡ଼ା ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇ ବୁଗୁଡ଼ା ଥାନା ଅତିରିକ୍ତ ଆଇଆଇସି ଶର୍ମିଷ୍ଠା ପ୍ରଧାନ ଘଟଣାର ତଦନ୍ତ କରି ଗୁରୁବାର ସନ୍ତୋଷଙ୍କୁ ଗିରଫ କରିଥିଲେ।
