ୟୁଜି,ପିଜି ପରୀକ୍ଷାକୁ ନେଇ ଏଭଳି ନିଷ୍ପତ୍ତି

ଭୁବନେଶ୍ୱର,୧୨।୬(ବ୍ୟୁରୋ): ଚଳିତ ବର୍ଷ ୟୁଜି/ପିଜି ପରୀକ୍ଷା ପ୍ରାୟତଃ ଅନୁଷ୍ଠିତ ହେବ। ଶନିବାର ବସିଥିବା କୁଳପତିମାନଙ୍କ ବୈଠକରେ ଏହି ନିଷ୍ପତ୍ତି ନିଆଯାଇଥିବା ନେଇ ଉଚ୍ଚଶିକ୍ଷା ମନ୍ତ୍ରୀ ଅରୁଣ ସାହୁ ସୂଚନା ଦେଇଛନ୍ତି। ସେ କହିଛନ୍ତି, କୁଳପତିମାନଙ୍କ ବୈଠକରେ ଯେଉଁ ନିଷ୍ପତ୍ତି ହୋଇଛି, ସେଥିରେ ଗୋଟିଏ କଥା ପରୀକ୍ଷା ପ୍ରାୟତଃ ହେବ। ଏହା ହେବା ଠିକ୍‌। ତେଣୁ ଛାତ୍ରୀଛାତ୍ରମାନଙ୍କୁ ମୋର ଅନୁରୋଧ ସେମାନେ ପାଠପାଢ଼ା ଜାରି ରଖନ୍ତୁ।
ବର୍ତ୍ତମାନ ଅନ୍‌ଲାଇନ୍‌ କ୍ଲାସ ଚାଲିଛି। ଜୁନ ସୁଦ୍ଧା ଅନେକ ସ୍ଥାନରେ କୋର୍ସ ପ୍ରାୟତଃ ଶେଷ ହୋଇଯିବ। ତେବେ କୁଳପତିମାନେ କିଛି ଦିନ ସମୟ ମାଗିଛନ୍ତି। ଏହା ଭିତରେ ସେମାନେ ବିଭିନ୍ନ କଲେଜର ଅଧ୍ୟକ୍ଷମାନଙ୍କ ସହିତ ଆଲୋଚନା କରିବେ। ତା’ସହିତ ଉଭୟ ଗ୍ରାମାଞ୍ଚଳ ଓ ସହରାଞ୍ଚଳର ଛାତ୍ରୀଛାତ୍ରମାନଙ୍କ ସହିତ ଆଲୋଚନା କରିବେ। ପରେ ଜୁନ ୧୮ ତାରିଖରେ ପୁଣି ବୈଠକ ହେବ ଓ ଏଥିରେ ପରୀକ୍ଷା ନେଇ ଚୂଡ଼ାନ୍ତ ନିଷ୍ପତ୍ତି ନିଆଯିବ।
ପରୀକ୍ଷା ହେବାନେଇ କୁଳପତିମାନଙ୍କ ବୈଠକରେ ନିଷ୍ପତ୍ତି ହୋଇଥିବା ବେଳେ, କିପରି ହେବ ସେ ନେଇ କିଛି ସ୍ପଷ୍ଟ ହୋଇନାହିଁ।