ନୂଆଦିଲ୍ଲୀ,୪।୬: ଅଲିମ୍ପିଆନ ସୁଶୀଲ କୁମାର ଜେଲ୍ରେ ଅତ୍ୟନ୍ତ ଭାବପ୍ରବଣ ହୋଇଯାଇଛନ୍ତି। ଦୁଇ ଦିନ ହେବ ମାଣ୍ଡୋଲି ଜେଲକୁ ଆସିଥିବା ସୁଶୀଲଙ୍କୁ ଜେଲ ପ୍ରଶାସନ ତାଙ୍କ ପରିବାର ସଦସ୍ୟଙ୍କ ସହ ଫୋନରେ କଥା ହେବାକୁ ଅନୁମତି ଦେଇଥିଲେ। ପରିବାର ଲୋକଙ୍କ ସହ କଥା ହୋଇ ସେ ଭୋ’ ଭୋ’ ହୋଇ କାନ୍ଦିବାକୁ ଲାଗିଥିଲେ। କୁସ୍ତି ଯୋଦ୍ଧା ସାଗର ଧନଖରଙ୍କ ହତ୍ୟା ମାମଲାରେ ସୁଶୀଲଙ୍କୁ ଗିରଫ କରାଯାଇଛି। ମେ ୪ ରାତିରେ ସାଗର ଧନଖରଙ୍କ ହତ୍ୟା ପରେ ସୁଶୀଲ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଦୌଡୁଥିଲେ। ଏହି ସମୟ ମଧ୍ୟରେ ସେ ତାଙ୍କ ପରିବାର ସଦସ୍ୟଙ୍କ ସହ କଥାବାର୍ତ୍ତା କରିବାର ସୁଯୋଗ ପାଇ ନ ଥିଲେ। ଜେଲ ସୂତ୍ରରୁ ଜଣାପଡିଛି ଯେ ସୁଶୀଲ ଜେଲରୁ ତାଙ୍କ ଘର ସହ କଥା ହେବାବେଳେ ଅତ୍ୟନ୍ତ ଭାବପ୍ରବଣ ହୋଇଥିଲେ। ତେବେ ସୁଶୀଲ ନିଜକୁ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲେ। ଦଶରୁ ପନ୍ଦର ମିନିଟ ପର୍ଯ୍ୟନ୍ତ ଚାଲିଥିବା ବାର୍ତ୍ତାଳାପ ସମୟରେ ସୁଶୀଲ ପରିବାର ସଦସ୍ୟଙ୍କ ବିଷୟରେ ପଚାରିଥିଲେ। ଜେଲ ଅଧିକାରୀ କହିଛନ୍ତି ଯେ କରୋନା ମହାମାରୀ ହେତୁ ବନ୍ଦୀମାନଙ୍କୁ ସେମାନଙ୍କ ପରିବାର ଲୋକଙ୍କ ସହ ଭେଟିବାକୁ ଦିଆଯାଉ ନାହିଁ। ଏଭଳି ପରିସ୍ଥିତିରେ ବନ୍ଦୀମାନଙ୍କୁ ସପ୍ତାହରେ ଦୁଇଥର ଫୋନ ଯୋଗେ କଥାବାର୍ତ୍ତା କରିବାକୁ ଅନୁମତି ଦିଆଯାଇଛି। ଗୁରୁବାର ନିୟମ ଅନୁଯାୟୀ ସୁଶୀଲଙ୍କୁ ତାଙ୍କ ପରିବାର ସଦସ୍ୟଙ୍କ ସହ କଥାବାର୍ତ୍ତା ମଧ୍ୟ କରାଯାଇଥିଲା।
