ମଣିଷଙ୍କ ପାଇଁ ଲାଞ୍ଜ; ଚାହୁଁଥିଲେ ପାଇପାରିବେ

କୁକୁର, ବିଲେଇଙ୍କ ଭଳି ମଣିଷର ଲାଞ୍ଜ ଥିଲେ କେମିତି ଦେଖାଯାଇଥାଆନ୍ତା କେବେ ଭାବିଛନ୍ତି? ଭାରି କୌତୁକିଆ ଦେଖାଯିବ ମଣିଷ। କିନ୍ତୁ ଏହା କ’ଣ କେବେ ସମ୍ଭବ। ଜାଣି ଆଶ୍ଚର୍ଯ୍ୟ ହେବେ ଏବେ ଆପଣ ଚାହିଁଲେ ବି ଲାଞ୍ଜଟିଏ ପାଇପାରିବେ। ‘ମି ଟେଲ୍‌’ ନାମକ ଏକ କମ୍ପାନୀ ତିଆରି କରିଛି ମଣିଷଙ୍କ ପାଇଁ ଲାଞ୍ଜ। ଏହି ଲାଞ୍ଜ ଏମିତି ସେମିତି ନୁହେଁ। ଏହାକୁ ଆପଣ ନିଜ ଇଚ୍ଛା ଅନୁସାରେ ସ୍ମାର୍ଟଫୋନ୍‌ କମାଣ୍ଡ ଜରିଆରେ ହଲାଇପାରିବେ। ଏହା ଏକ ଆନିମାଟ୍ରୋନିକ୍‌ ଲାଞ୍ଜ। ଉକ୍ତ ଲାଞ୍ଜ ଦେଖିବାକୁ ସତସତିକା ଲାଗେ। ଏହି ଲାଞ୍ଜରେ ଏକ ରିମୁଭେବଲ୍‌ କଭର୍‌, ଫାଷ୍ଟ ୟୁଏସ୍‌ବି ସି-ଚାର୍ଜିଂ ଅଛି। ତା’ସହ ଏହା ପାଓ୍ବାରବ୍ୟାଙ୍କ ଦ୍ୱାରା ବି ଚାର୍ଜ ହୋଇପାରେ। ଯଦ୍ୱାରା ୧୦ ଘଣ୍ଟା ପର୍ଯ୍ୟନ୍ତ ଏହାକୁ ଆରାମରେ ବ୍ୟବହାର କରିପାରିବେ। ଏଥିରେ ନୂଆ ପ୍ରକାରର ଡି କ୍ଲିପ୍‌ ଲଗାଯାଇଛି। ଫଳରେ ବେଶ୍‌ ସହଜରେ ଗୋଟିଏ ହାତରେ ଲାଞ୍ଜ ଲଗେଇ ହେବ। ଏହି ଲାଞ୍ଜ ବହୁତ ହାଲ୍‌କା। ଏହା ଏକ ଆପ୍‌ ଦ୍ୱାରା ନିୟନ୍ତ୍ରିତ ହୋଇଥାଏ। ଏହାବାଦ୍‌ ଏଥିରେ ନୋ ଫୋନ୍‌ ମୋଡ୍‌ ବି ଅଛି; ଯଦ୍ଦ୍ବରା ଲାଞ୍ଜ ବିନା ଆପ୍‌ରେ ବି ଆକ୍ଟିଭେଟ୍‌ ହେବାର ୬୦ ସେକେଣ୍ଡ ପରେ ଆପେ ହଲିଥାଏ। ଫଳରେ ଲାଞ୍ଜ ସତସତିକା ପରି ଲାଗେ।