ଲୋଇସିଂହା,୨।୬: ବଲାଙ୍ଗୀର ଜିଲା ଲୋଇସିଂହା ଥାନାଠାରୁ ୨ଶହ ମିଟର ଦୂର ମଣ୍ଟୁ କଲୋନୀର ଏକ ଭଡା ଘରୁ ବୁଧବାର ଜଣେ ୧୯ ବର୍ଷୀୟା ଯୁବତୀଙ୍କ ମୃତଦେହ ପୋଲିସ ଜବତ କରିଛି। ମୃତ ଯୁବତୀ ହେଲେ ସେମେଲମୁଣ୍ଡା ଗାଁର ମିନାକ୍ଷୀ ବେହେରା। ଝିଅ ମିନାକ୍ଷୀଙ୍କୁ ହତ୍ୟା କରାଯାଇଥିବା ନେଇ ବାପା ନାରାୟଣ ବେହେରା ଥାନାରେ ଅଭିଯୋଗ କରିଛନ୍ତି।
ଅଭିଯୋଗକୁ ଭିତ୍ତି କରି ପୋଲିସ ଜଣେ ଯୁବକଙ୍କୁ ଥାନାରେ ଅଟକ ରଖି ପଚରାଉଚରା କରୁଛି। ମୃତଦେହ ନିକଟରୁ ଏକ ସୁଇସାଇଡାଲ ନୋଟ ମିଳିଛି। ଏଥିରେ ଅନ୍ୟ ଜଣେ ଯୁବତୀଙ୍କ ନାମ ଉଲ୍ଲେଖ ରହିଛି। ତ୍ରିକୋଣୀୟ ପ୍ରେମରୁ ଏପରି ଘଟଣା ଘଟି ଥାଇପାରେ ବୋଲି ପୋଲିସ ସନ୍ଦେହ କରୁଛି। ବ୍ୟବଚ୍ଛେଦ ରିପୋର୍ଟ ଆସିଲା ପରେ ସବୁ କିଛି ସ୍ପଷ୍ଟ ହେବ ବୋଲି ଆଇଆଇସି ରମାକାନ୍ତ ଜେନା କହିଛନ୍ତି।
ସୂଚନା ଅନୁଯାୟୀ, ଲୋଇସିଂହା ବ୍ଲକ ହୀରାପୁର ପଞ୍ଚାୟତ ସେମେଲମୁଣ୍ଡା ଗାଁର ମିନାକ୍ଷୀ କୁଶଙ୍ଗ କଲେଜରେ ଯୁକ୍ତ ୩ର ଦ୍ୱିତୀୟ ବର୍ଷ ଛାତ୍ରୀ ଥିଲେ। ସକମା ଗ୍ରାମର କିଶୋର ପୋଢଙ୍କ ସହ ତାଙ୍କର ପ୍ରେମ ସମ୍ପର୍କ ଗଢି ଉଠିଥିଲା। ୨୦୨୦ ଅକ୍ଟୋବର ୨୦ରେ ମିନାକ୍ଷୀ ଆଧାର କାର୍ଡ ସଂଶୋଧନ କରିବାକୁ ଯାଉଛି କହି ଘରୁ ଆସିଥିଲେ। ଏହାପରେ ସେ ଆଉ ଘରକୁ ଫେରି ନ ଥିଲେ। କିଶୋର ତାଙ୍କ ଝିଅକୁ ନେଇ ଫେରାର ହୋଇଥିବା ଦର୍ଶାଇ ନାରାୟଣ ଲୋଇସିଂହା ଥାନାରେ ଅଭିଯୋଗ କରିଥିଲେ। ଏ ନେଇ ପୋଲିସ ଏକ ମାମଲା(ନଂ.୨୮୮/୨୧) ରୁଜୁ କରିଥିଲା। ୨୦୨୧ ମାର୍ଚ୍ଚ ୨ରେ ଉଭୟ ପରିବାର ପକ୍ଷରୁ ଥାନାରେ ହୋଇଥିବା ଚୁକ୍ତିନାମା ଅନୁସାରେ ମିନାକ୍ଷୀ ଓ କିଶୋର ସ୍ବାମୀ ସ୍ତ୍ରୀ ହିସାବରେ ରହିବାକୁ ସ୍ଥିର ହୋଇଥିଲା। ସେଦିନରୁ ଉଭୟ ଲୋଇସିଂହା ମଣ୍ଟୁ କଲୋନୀରେ ରହୁଥିଲେ। ବୁଧବାର ସକାଳେ କିଶୋର ଲୋଇସିଂହା ଥାନାକୁ ଯାଇ ମିନାକ୍ଷୀ ବିଷପିଇ ଆତ୍ମହତ୍ୟା କରିଥିବା ଜଣାଇଥିଲେ। ଖବର ପାଇ ପୋଲିସ ଓ ମିନାକ୍ଷୀଙ୍କ ପରିବାର ଲୋକେ ଘଟଣାସ୍ଥଳରେ ପହଞ୍ଚିଥିଲେ। ଘର ଚଟଣାରେ ମୃତଦେହ ପଡିଥିଲା। ପାରିପାର୍ଶ୍ୱିକ ସ୍ଥିତିରୁ ଝିଅକୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଥିଲେ। ମିନାକ୍ଷୀ ସକାଳେ ସୁସ୍ଥ ଥିଲେ ଓ ତାକୁ ନିଜେ ରାଶନ ସାମଗ୍ରୀ ଦେଇ ଫେରିଥିବା ନାରାୟଣ କହିଥିଲେ। ଏହି ଘଟଣାରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ରହିଥିବା ସେ ଅଭିଯୋଗ କରିଛନ୍ତି। ଡିଏସ୍ପି ଅମୃତ କୁମାର ପଣ୍ଡା, ଆଇଆଇସି ରମାକାନ୍ତ ଜେନା ଘଟଣାର ତଦନ୍ତ ଆରମ୍ଭ କରିଛନ୍ତି। ଏ ନେଇ ଥାନାରେ ଦଫା ୩୦୨, ୪୯୮(ଏ), ୩୦୪(ବି)ରେ ଏକ ମାମଲା (ନଂ.୧୪୮/୨୧) ରୁଜୁ ହୋଇଛି।
