ରାଜଗଡ଼,୩।୬: କରୋନା ମହାମାରୀର ଦ୍ୱିତୀୟ ଲହର ଯୋଗୁ ଦେଶରେ ସଙ୍କଟ ସୃଷ୍ଟି ହୋଇଛି। ଏପରିସ୍ଥଳେ ମଧ୍ୟପ୍ରଦେଶର ରାଜଗଡ଼ ଜିଲାରେ ପାଦୁକ ପାଣି ପିଇଲେ କରୋନା ଭଲ ହେଉଥିବା ପ୍ରଚାର ହେବାରେ ଲାଗିଛି। ଏହାର ୫୫ ସେକେଣ୍ଡର ଏକ ଭିଡ଼ିଓ ଟୁଇଟରରେ ଅପଲୋଡ୍ କରାଯାଇଛି। ଏହା ଏବେ ଭାଇରାଲ ହେବାରେ ଲାଗିଛି। ସ୍ଥାନୀୟ ଚାଟୁଖେଡ଼ା ଗାଁରେ ଥିବା ମନ୍ଦିର ସମ୍ମୁଖରେ ଲୋକେ ଭିଡ଼ ଜମାଇ ପାଦୁକ ପାଣି ପିଉଥିବାରୁ ଦୃଶ୍ୟ ଭିଡ଼ିଓରେ ଦେଖିବାକୁ ମିଳୁଛି। ଲୋକେ କରୋନା ମାର୍ଗଦର୍ଶିକା ପାଳନ ନ କରି ସାମାଜିକ ଦୂରତା ବଜାୟ ନ ରଖିବା ସହିତ ମାସ୍କ୍ ମଧ୍ୟ ପିନ୍ଧି ନ ଥିବା ଭିଡ଼ିଓରେ ଦେଖାଯାଉଛି। ଖବର ପ୍ରଚାର ହେବା ପରେ ବୁଧବାର ପୂର୍ବାହ୍ନ ୧୧ରୁ ମଧ୍ୟାହ୍ନ ୧୨ଟା ମଧ୍ୟରେ ଲୋକେ ଭିଡ଼ ଜମାଇଥିଲେ। ଖବର ପାଇ ପୋଲିସ ଏଭଳି ପ୍ରଚାର କରିଥିବା ଦୁଇଜଣ ମହିଳା ଏବଂ ଦୁଇଜଣ ପୁରୁଷଙ୍କୁ ଗିରଫ କରିଛି। ଏହାର ତଦନ୍ତ ଜାରି ରହିଛି।
