ନୂଆଦିଲ୍ଲୀ,୪।୬: ଭାରତ ପାଇଁ କ୍ରିକେଟ ଗ୍ରାଉଣ୍ଡରେ ଅନେକ ସଫଳତା ହାସଲ କରିଥିବା ମହେନ୍ଦ୍ର ସିଂ ଧୋନୀ, ଯୁବରାଜ ସିଂ (ଯୁବି) ଓ ବିରାଟ କୋହଲିଙ୍କୁ ଗୋଟିଏ ଶବ୍ଦରେ ବର୍ଣ୍ଣନା କରିବା କଷ୍ଟକର ବ୍ୟପାର। କିନ୍ତୁ ଆଫଗାନିସ୍ତାନର ଲେଗ୍ ସ୍ପିନର ରଶିଦ ଖାନଙ୍କ ନିକଟରେ ରହିଛି ଏହାର ଉତ୍ତର।
ନିକଟରେ ସୋସିଆଲ ମିଡିଆରେ ଫ୍ୟାନଙ୍କ ସହ ପ୍ରଶ୍ନ ଉତ୍ତର ସେଗମେଣ୍ଟ ଅବସରରେ ଜଣେ ଫ୍ୟାନ ଭାରତୀୟ କ୍ରିକେଟର ଉପରୋକ୍ତ ୩ କିମ୍ବଦନ୍ତୀଙ୍କୁ ଗୋଟିଏ ଶବ୍ଦରେ ପ୍ରକାଶ କରିବାକୁ କହିଥିଲେ। ସୀମିତ ଓଭର କ୍ରିକେଟର ଅନ୍ୟତମ ଶ୍ରେଷ୍ଠ ସ୍ପିନର ଭାବେ ଜଣାଶୁଣା ରଶିଦ କୋହଲିଙ୍କୁ ‘କିଙ୍ଗ୍’ ଅଭିହିତ କରିଥିଲେ। ସେହିଭଳି ଯୁବିଙ୍କୁ ‘ଛକାର ରାଜା’ କହିଥିଲେ ରଶିଦ। କିନ୍ତୁ ଏହି ତାରକା ସ୍ପିନର ସମସ୍ତ ଆଇସିସି ଟ୍ରଫି ଅଧିକାରୀ ଧୋନୀଙ୍କ ପାଇଁ ଗୋଟିଏ ଶବ୍ଦ ଯଥେଷ୍ଟ ନୁହେଁ ବୋଲି ଉତ୍ତର ଦେଇଥିଲେ।
