ଭୁବନେଶ୍ୱର,୬।୬(ବ୍ୟୁରୋ): ଅନେକ ସମୟରେ ପୋଲିସର ଅବହେଳା ଓ ଅସାବଧାନତା ଯୋଗୁ ଅଭିଯୁକ୍ତମାନେ ଖସିପଳାଇବାରେ ସକ୍ଷମ ହେଉଛନ୍ତି। ବଳାତ୍କାର, ହତ୍ୟା ଭଳି ସଙ୍ଗିନ ମାମଲାରେ ଗିରଫ ହୋଇଥିବା ବହୁ ଅଭିଯୁକ୍ତ ପୋଲିସ ହେପାଜତରୁ ଖସିଯାଇଥିବା ନଜିର ରହିଛି। ବର୍ଷ ବର୍ଷ ଧରି ଖସି ବୁଲିବା ସହ ପୁଣି ଅପରାଧ ଘଟାଉଥିଲେ ମଧ୍ୟ ପୋଲିସ ସେମାନଙ୍କୁ ଫେରାର ଦର୍ଶାଇ ଧରି ନ ଥାନ୍ତି। ଏପରି କି ଏହା ପଛରେ କେତେଜଣ ପୋଲିସର ପ୍ରଚ୍ଛନ୍ନ ହାତ ଥିବା ମଧ୍ୟ ଅଭିଯୋଗ ଉଠିଛି। କମିଶନରେଟ ପୋଲିସରେ ମଧ୍ୟ ଏଭଳି ଏକାଧିକ ଘଟଣା ଘଟିଛି। ଏବେ ନିଜ ପୁରୁଣା ଭୁଲ୍ ସୁଧାରିବାକୁ ଆରମ୍ଭ ହୋଇଛି ସ୍ପେଶାଲ ଡ୍ରାଇଭ୍। ଏହାର ଦାୟିତ୍ୱ ନେଇଛି ସ୍ପେଶାଲ ସ୍କ୍ବାଡ୍। ପୋଲିସ ହେପାଜତ ଓ ଜୁଡ଼ିସିଆଲ ହେପାଜତରୁ ଖସିପଳାଇଥିବା ଅଭିଯୁକ୍ତଙ୍କ ଏକ ତାଲିକା ପ୍ରସ୍ତୁତ କରାଯାଇ ସେମାନଙ୍କୁ ଧରିବାକୁ ଉଦ୍ୟମ ଚାଲିଛି। ଏଯାଏ ଏହି ତାଲିକାରେ ୧୦ରୁ ଊର୍ଦ୍ଧ୍ୱ ନାଁ ରହିଥିବାବେଳେ ଗତ ୩ଦିନ ଭିତରେ ଏହି ସ୍ପେଶାଲ୍ ଡ୍ରାଇଭ୍ରେ ୨ଜଣ ଫେରାର ଅଭିଯୁକ୍ତ ଧରାପଡିଛନ୍ତି। ୨୦୨୦ରେ ଏୟାରଫିଲ୍ଡ ଥାନାରୁ ଫେରାର ହୋଇଯାଇଥିବା ହତ୍ୟା ଅଭିଯୁକ୍ତ ଜିତେନ୍ଦ୍ର ପରିଡ଼ାଙ୍କୁ ଶୁକ୍ରବାର ଗିରଫ କରାଯାଇଛି। ସେହିପରି ୭ବର୍ଷ ଧରି ଫେରାର ଥିବା ଭାସ୍କର ସାହୁ ନାମକ ଜଣେ ଗଣବଳାତ୍କାର ଅଭିଯୁକ୍ତଙ୍କୁ ନୟାଗଡ଼ ଓଡ଼ଗାଁ ଅଞ୍ଚଳରୁ ଗିରଫ କରାଯାଇଛି। ଭାସ୍କର ୨୦୧୪ରେ ଥରେ ପୋଲିସ ହେପାଜତ ଓ ଆଉଥରେ ଜୁଡିସିଆଲ ହେପାଜତରୁ ଫେରାର ହୋଇଯାଇଥିଲେ। ସେ ନୟାଗଡ଼ସ୍ଥିତ ନିଜ ଘରେ ରହି ବାହାରେ ଆରାମରେ ବୁଲୁଥିଲେ ମଧ୍ୟ ସ୍ଥାନୀୟ ପୋଲିସ ହେଉ ଅବା କମିଶନରେଟ ପୋଲିସ ତାଙ୍କୁ ଧରୁ ନ ଥିଲା। ସ୍ପେଶାଲ ଡ୍ରାଇଭ୍ ଆରମ୍ଭ ହେବା ପରେ ତାଙ୍କ ସମ୍ପର୍କରେ ଖୋଳତାଡ଼ କରାଯାଇଥିଲା। ଶୁକ୍ରବାର ଭାସ୍କର ଘରପାଖ ଏକ ମନ୍ଦିରରେ ବସିଥିବା ସମୟରେ ସ୍ପେଶଲ ସ୍କ୍ବାଡ୍ ତାଙ୍କୁ ମାଡ଼ିବସିଥିଲା।
ଅନୁଯାୟୀ, ୨୦୧୪ ଫେବୃୟାରୀ ୧୩ରେ ଜନୈକା ଯୁବତୀଙ୍କୁ ଗଣବଳାତ୍କାର ମାମଲା (ନଂ.୪୧/୧୪)ରେ ଭାସ୍କରଙ୍କ ସମେତ ୪ଜଣଙ୍କୁ ଗିରଫ କରିଥିଲା ଭୁବନେଶ୍ୱର ମହିଳା ଥାନା ପୋଲିସ। ମାତ୍ର କୋର୍ଟ ଚାଲାଣ ସମୟରେ ସେ ପୋଲିସ ହେପାଜତରୁ ଚମ୍ପଟ ମାରିଥିଲେ। ଏହାର ଦିନକ ପରେ ପୋଲିସ ତାଙ୍କୁ ଧରି କୋର୍ଟ ଚାଲାଣ କରିଥିଲା। ଡିସେମ୍ବର ୯ରେ ଅନ୍ୟ ୩୨ଜଣଙ୍କ ସହ ଭାସ୍କରଙ୍କୁ ଜେଲ୍ରୁ କୋର୍ଟକୁ ଏସ୍କର୍ଟରେ ନିଆଯାଇଥିଲା। ହେଲେ କୋର୍ଟ ପରିସରରେ ଭିଡ଼ର ସୁଯୋଗ ନେଇ ଭାସ୍କର ପୋଲିସ ଏସ୍କର୍ଟରୁ ଖସିପଳାଇବାରେ ସକ୍ଷମ ହୋଇଥିଲେ।
