କେନ୍ଦୁଝର, ୭ା୬ : କେନ୍ଦୁଝର ଜିଲା ବଡ଼ବିଲ ଥାନା ଅଞ୍ଚଳର ଜଣେ ବିଧବା ମହିଳାଙ୍କୁ ଗାଡ଼ିରେ ଉଠାଇ ନେଇ ଗଣବଳାତ୍କାର କରାଯାଇଥିବା ଅଭିଯୋଗ ହୋଇଛି। ଏହି ଘଟଣାରେ ପୋଲିସ ୨ଜଣଙ୍କୁ ଗିରଫ କରିଥିବା ବେଳେ ଜଣେ ନାବାଳକଙ୍କୁ ଜୁଭେନାଇଲ ଜଷ୍ଟିସ ବୋର୍ଡ ଆଗରେ ହାଜର କରାଯାଇଥିବା ଥାନା ଅଧିକାରୀ ସୁଶାନ୍ତ ଦାଶ କହିଛନ୍ତି। ଗିରଫ ୨ ଅଭିଯୁକ୍ତ ହେଲେ ଏସେଲ ହଟିଂର ଅକ୍ଷୟ ଓଝା ଓ ବରକତନଗରର ଅର୍ମାନ ଖାନ।
ପ୍ରକାଶ ଯେ, ଗତ ୩ ତାରିଖରେ ଏହି ଘଟଣା ଘଟିଥିବା ବେଳେ ୬ ତାରିଖରେ ପୀଡ଼ିତା ଥାନାରେ ଅଭିଯୋଗ କରିଥିଲେ। ଏନେଇ ପୋଲିସ ଏକ ମାମଲା (ନଂ.୯୪/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା। ଘଟଣା ଦିନ ରାତି ପ୍ରାୟ ସାଢ଼େ ୯ଟାରେ ମହିଳା ଜଣକ ପରିବା ବିକି କୋଇଡ଼ାରୁ ଘରକୁ ଫେରୁଥିବା ବେଳେ ୩ ଜଣ ଯୁବକ ଏକ ସ୍କର୍ପିଓରେ ଆସି ଗୁରୁଦ୍ୱାର ନିକଟରୁ ତାଙ୍କୁ ଜୋରଜବରଦସ୍ତ ଉଠାଇନେଇଥିଲେ। ସେମାନେ ମହିଳାଠାରୁ ୧୩ ହଜାର ଟଙ୍କା ଲୁଟ୍ କରିବା ପରେ ମୁଣ୍ଡାନାଳ ଜଙ୍ଗଲକୁ ନେଇ ଗଣ ବଳାତ୍କାର କରିଥିବା ଅଭିଯୋଗରେ ଦର୍ଶାଯାଇଛି। ମହିଳାଙ୍କୁ ଜଙ୍ଗଲରେ ଅଟକାଇ ରଖିଥିଲେ ହେଁ କୌଶଳ କ୍ରମେ ସେ ଖସି ଆସିଥିଲେ। ଭୟରେ ଘରେ ଲୁଚି ରହିବା ପରେ ୩ ଦିନ ପରେ ଥାନାରେ ଅଭିଯୋଗ କରିଥିଲେ।
