ବମ୍ବେ: ଅଭିନେତା ସୁଶାନ୍ତ ସିଂହ ରାଜପୁତଙ୍କ କ୍ୟାରିୟର ବଦଳାଇ ଦେଇଥିଲା ଟେଲି ଧାରାବାହିକ ‘ପବିତ୍ର ରିସ୍ତା’। ତାଙ୍କ ମୃତ୍ୟୁ ପରେ ଓଟିଟି ପ୍ଲାଟଫର୍ମରେ ଏହି ଧାରାବାହିକ ପୁଣି ଥରେ ଦେଖିବାକୁ ପାଇବେ ଦର୍ଶକ। ସେ ବି ନୂଆ ରୂପରେ। ନୂଆ ଅଭିନେତାଙ୍କ ସହ। ଧାରାବାହିକର ଦ୍ୱିତୀୟ ଭାଗରେ ଅଭିନେତ୍ରୀ ଅଙ୍କିତା ଲୋଖଣ୍ଡେ ପୁଣିଥରେ ଅର୍ଚ୍ଚନା ଭୂମିକାରେ ନଜର ଆସିବେ। ସେହିଭଳି ସୁଶାନ୍ତଙ୍କ ଭୂମିକାରେ ନଜର ଆସିପାରନ୍ତି ଅଭିନେତା ଶାହିର ଶେଖ। ଯଦି ଏଭଳି ହୁଏ ତେବେ ପବିତ୍ର ରିସ୍ତା ୨.୦ରେ ଶାହିର ମାନବ ଦେଶମୁଖ ଭୂମିକା ତୁଲାଇବେ।
ଶାହିର ପୂର୍ବରୁ ‘କୁଛ ରଙ୍ଗ ପ୍ୟାର୍ କେ ଐସେ ଭି’, ‘ୟେ ରିସ୍ତେ ହୈ ପ୍ୟାର୍ କେ, ମହାଭାରତ’ରେ ନଜର ଆସିଛନ୍ତି। ତାଙ୍କ ପୂର୍ବରୁ ଅଭିନେତା ହର୍ଷଦ ଚୋପ୍ରାଙ୍କୁ ମାନବଙ୍କ ଭୂମିକା ପାଇଁ କୁହାଯାଇଥିଲା। ହେଲେ ଏବେ ଶାହିଦଙ୍କୁ ବଛାଯାଇଥିବା ନେଇ ଚର୍ଚ୍ଚା ହେଉଛି।
୨୦୦୯ରେ ଜି ଟିଭିରେ ପ୍ରସାରିତ ହୋଇଥିଲା ପବିତ୍ର ରିସ୍ତା। ଦୁଇ ବର୍ଷ ଧରି ସୁଶାନ୍ତ ଏଥିରେ ମାନବ ଭୂମିକାରେ ଅଭିନୟ କରିଥିଲେ। ୨୦୧୪ରେ ଏହା ଅଫ୍ ଏୟାର ହୋଇଥିଲା।
