ବରେଲି,୨୫।୬: ମାସ୍କ ପିନ୍ଧି ନ ଥିବାରୁ ଜଣେ ଗ୍ରାହକଙ୍କୁ ଗୁଳି କରିଛନ୍ତି ଏକ ବ୍ୟାଙ୍କର ସିକ୍ୟୁରିଟି ଗାର୍ଡ। ଉତ୍ତର ପ୍ରଦେଶର ବରେଲି ଜିଲାରେ ଘଟିଛି ଏଭଳି ଘଟଣା। ତେବେ ଉକ୍ତ ଗ୍ରାହକଙ୍କ ସ୍ବାସ୍ଥ୍ୟବସ୍ଥା ସ୍ଥିର ଥିବା ଜଣାପଡ଼ିଛି।
ବରେଲି ଜିଲାର ବ୍ୟାଙ୍କ୍ ଅଫ୍ ବରୋଦାର ଏକ ବ୍ରାଞ୍ଚରେ ମାସ୍କ ନ ପିନ୍ଧିଥିବାରୁ ରେଲଓ୍ବେ କର୍ମଚାରୀ ରାଜେଶ କୁମାରଙ୍କ ସହ ସିକ୍ୟୁରିଟି ଗାର୍ଡଙ୍କ ଯୁକ୍ତିତର୍କ ହୋଇଥିଲା। ଏଥିରେ ଉତ୍ୟକ୍ତ ହୋଇ ସିକ୍ୟୁରିଟି ଗାର୍ଡ ରାଜେଶଙ୍କ ଜଙ୍ଘକୁ ଗୁଳି କରିଥିଲେ। ପୀଡ଼ିତଙ୍କ ସାଙ୍ଗରେ ଥିବା ସ୍ତ୍ରୀ ପଚାରି ଥିଲେ, ତୁମେ ଗୁଳି କାହିଁକି କଲ। ସମ୍ପୂର୍ଣ୍ଣ ଘଟଣାର ଭିଡିଓ ଶୁଟ୍ କରିଥିଲେ ଅନ୍ୟ ଜଣେ ଗ୍ରାହକ।
ଉକ୍ତ ଗାର୍ଡକୁ ୟୁପି ପୋଲିସ ଅଟକ ରଖି ପଚରାଉଚୁରା କରୁଛି। ତେବେ ସିକ୍ୟୁରିଟି ଗାର୍ଡ ନିଜ ପକ୍ଷ ରଖି କହିଛନ୍ତି, ମୁଁ ମଧ୍ୟ ଆହତ ହୋଇଛି। ମୋ ଶାର୍ଟ ବଟନ ମଧ୍ୟ ଛିଣ୍ଡି ଯାଇଛି। ମୋ ରାଇଫଲ ଲୋଡେଡ୍ ଥିଲା। ଅଜଣାତରେ ଟ୍ରିଗର ଚାପି ଦେଇଥିଲି।
