ଢାକା,୧୩।୬: ବାଂଲାଦେଶର ଶାକିବ ଅଲ ହାସନ ଘରୋଇ ଟି୨୦ ମ୍ୟାଚ୍ବେଳେ ଅମ୍ପାୟରଙ୍କୁ ଗାଳି ଗୁଲଜ କରିବା ସହ ଉଇକେଟକୁ ଗୋଇଠା ମାରିବା ମହଙ୍ଗା ପଡ଼ିଛି। ଏହି କାରଣରୁ ଆସନ୍ତା ୩ ମ୍ୟାଚରୁ ବାସନ୍ଦ ହୋଇଛନ୍ତି ଆଇସିସି ଦିନିକିଆ କ୍ରିକେଟର ଶୀର୍ଷ ର଼୍ୟାଙ୍କଧାରୀ ଅଲରାଉଣ୍ଡର। ଏଥି ସହ ତାଙ୍କ ଉପରେ ୫ ଲକ୍ଷ ଟାକାର ଜରିମାନା ଲଗାଯାଇଛି। ଭାରତୀୟ ମୂଦ୍ରାରେ ଏହାର ମୂଲ୍ୟ ୪.୩୧ ଲକ୍ଷ ଟଙ୍କାରୁ ଊର୍ଦ୍ଧ୍ୱ।
ଚଳିତ ବଙ୍ଗବନ୍ଧୁ ଢାକା ପ୍ରିମିୟର ଡିଭିଜନ ଟି୨୦ ଟୁର୍ନାମେଣ୍ଟରେ ଶୁକ୍ରବାର ଖେଳାଯାଇଥିବା ଆବାହାନୀ ଲିମିଟେଡ୍ ବିପକ୍ଷ ମ୍ୟାଚ୍ରେ ମହମ୍ମେଦାନ ସ୍ପୋର୍ଟିଂ କ୍ଲବର ନେତୃତ୍ୱ ନେଇଥିଲେ ୩୪ ବର୍ଷୀୟ ଶାକିବ। ସେ ବୋଲିଂ କରୁଥିବାବେଳେ ବ୍ୟାଟ୍ସମ୍ୟାନଙ୍କ ବିରୋଧରେ ଏଲବିଡବ୍ଲ୍ୟୁ ଅପିଲ କରିଥିଲେ, ଯାହାକୁ ନାକଚ କରି ଦେଇଥିଲେ ଅମ୍ପାୟର। ଉତ୍ତ୍ୟକ୍ତ ହୋଇ ଉଇକେଟକୁ ଗୋଇଠା ମାରିବା ସହ ଅମ୍ପାୟରଙ୍କ ଗାଳି ଗୁଲଜ କରିଥିଲେ। ଏହାପରେ ବର୍ଷା କାରଣରୁ ମ୍ୟାଚ୍କୁ ସ୍ଥଗିତ କରିବାକୁ ନିର୍ଦ୍ଦେଶ ଦେଇଥିଲେ ଅମ୍ପାୟର। ଏଥିରେ ଆପତ୍ତି ଉଠାଇ ଉଇକେଟ ଓପାଡ଼ି ଫଲ୍ଡରେ କଚାଡ଼ି ଦେଇଥିଲେ ଶାକିବ। ଅବଶ୍ୟ ପରେ ସୋସିଆଲ ମିଡିଆ ଜରିଆରେ କ୍ଷମାପ୍ରାର୍ଥନା କରିଥିଲେ ବାଂଲାଦେଶର ପୂର୍ବତନ ଅଧିନାୟକ।
