ନୂଆଦିଲ୍ଲୀ,୬।୬: କେନ୍ଦ୍ରର କୃଷି ଆଇନ ବିରୋଧରେ ଦୀର୍ଘଦିନ ହେଲା ଆନ୍ଦୋଳନ ଚଳାଇଥିବା ଚାଷୀ ଶନିବାରଦେଶବ୍ୟାପୀ ସମ୍ପୂର୍ଣ୍ଣ କ୍ରାନ୍ତି ଦିବସ ପାଳନ କରିଛନ୍ତି। ସେମାନେ ଭାଜପା ଏମ୍ପି ଏବଂ ବିଧାୟକମାନଙ୍କ ଘର ଆଗରେ କୃଷି ଆଇନର ନକଲ ପୋଡ଼ିଥିଲେ। ୨୦୨୦ ଜୁନ୍ ୫ରେ ସରକାର ଅଧ୍ୟାଦେଶ ବଳରେ ନୂଆ କୃଷି ଆଇନ କାର୍ଯ୍ୟକାରୀ କରିଥିଲେ। ସେଥିପାଇଁ ଆଜିର ଦିନରେ ଚାଷୀମାନେ ଭାଜପା ବିରୋଧୀ ସ୍ଲୋଗାନ ଦେବା ସହ ବିକ୍ଷୋଭ ପ୍ରଦର୍ଶନ କରିଥିଲେ। ସଂଯୁକ୍ତ କିଷାନ ମୋର୍ଚ୍ଚା (ଏସ୍କେଏମ୍) ଆହ୍ବାନରେ ପଞ୍ଜାବ, ହରିୟାଣା, ଆନ୍ଧ୍ରପ୍ରଦେଶ, କର୍ନାଟକ, ତାମିଲନାଡୁ, ଓଡ଼ିଶା, ଛତିଶଗଡ଼, ବିହାର, ତେଲଙ୍ଗାନା, ମଧ୍ୟପ୍ରଦେଶ, ମହାରାଷ୍ଟ୍ର, ରାଜସ୍ଥାନ ଓ ଉତ୍ତରପ୍ରଦେଶରେ ଚାଷୀମାନେ ବିକ୍ଷୋଭରେ ସାମିଲ ହୋଇଥିଲେ। ହରିୟାଣା ବିଧାନସଭା ବାଚସ୍ପତି ଗିଆନ୍ ଚାନ୍ଦ ଗୁପ୍ତାଙ୍କ ଘର ଆଡ଼କୁ ଶୋଭାଯାତ୍ରାରେ ଯାଉଥିବା ଚାଷୀଙ୍କୁ ପୋଲିସ ଅଟକାଇବାରୁ ସେମାନେ କାଲ୍କା-ଜିରାକପୁର ରାସ୍ତା ଅବରୋଧ କରିଥିଲେ। ପୋଲିସ ସେମାନଙ୍କୁ ଘଉଡ଼ାଇବାକୁ ଯାଇ ଲାଠିଚାଳନା କରିଥିଲା। ହରିୟାଣାର ଫତେହାବାଦ ଅନ୍ତର୍ଗତ ତୋହାନାଠାରେ ରାକେଶ ଟିକାୟତ, ଗୁର୍ନାମ ସିଂ ଚଡୁନି ଏବଂ ଯୋଗେଶ ଯାଦବଙ୍କ ନେତୃତ୍ୱରେ ବହୁସଂଖ୍ୟାରେ ଚାଷୀ ଏକତ୍ର ହୋଇଥିଲେ।
