ବାସୁଦେବପୁର, ୨୬।୬ – ଦୀର୍ଘଦିନର ଦରମା ଅଟକ ରହିଥିଲା। ବିଭାଗୀୟ କର୍ତ୍ତୃପକ୍ଷଙ୍କ ନିକଟକୁ ଦୌଡ଼ି ଦୌଡ଼ି ନୟାନ୍ତ ହୋଇଥିଲେ ମଧ୍ୟ ଶୁଣି ନ ଥିଲେ କେହି। ଶେଷରେ କିଛି ବାଟ ନ ପାଇ ଆତ୍ମହୁତି ଉଦ୍ୟମ କଲେ କର୍ମଚାରୀ। ଭଦ୍ରକ ଜିଲା ବାସୁଦେବପୁର ସହରରୁ ଆସିଛି ଏଭଳି ଖବର।
ଜଳସମ୍ପଦ ବିଭାଗର ଅସ୍ଥାୟୀ କର୍ମଚାରୀ ଭାବେ କାମ କରିଆସୁଛନ୍ତି ଦିବାକର ଦାସ। ୨୦୧୬ଠାରୁ ବକେୟା ଦରମା ପାଇ ନ ଥିବାବେଳେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କଠାରେ ଦାବି କରି ନିରାଶ ହୋଇଥିଲେ। ଶେଷରେ ବକେୟା ଦରମା ଦାବି କରି ଶନିବାର ମଧ୍ୟାହ୍ନରେ କାର୍ଯ୍ୟାଳୟ ସମ୍ମୁଖରେ କିରୋସିନ ଢାଳି ଆତ୍ମାହୁତି ଉଦ୍ୟମ କରିଥିଲେ। ଠିକ୍ ସମୟରେ ପୋଲିସ ପହଞ୍ଚି ତାଙ୍କୁ ଅଟକାଇଥିଲା। ଦିବାକରଙ୍କ ଘର ମନ୍ଦାରୀ ଅଞ୍ଚଳରେ। ଥାନାରେ ବିଭାଗୀୟ ଅଧିକାରୀଙ୍କ ସହ ଆଲୋଚନା ପରେ ତାଙ୍କୁ ଛାଡ଼ି ଦିଆଯାଇଛି।
