ନୂଆଦିଲ୍ଲୀ: ଦୁନିଆରେ ବହୁତ ଅଦ୍ଭୁତ ଜିନିଷ ଅଛି, କିନ୍ତୁ ଆପଣ ସମୁଦ୍ର ଉପରେ ଥିବା ଗାଁ ବିଷୟରେ ଶୁଣିଛନ୍ତି? ହୁଏତ ନା। ଚାଇନାରେ ଏଭଳି ଏକ ଗାଁ ରହିଛି। ଏହା ଚାଇନାର ଫୁଜିଆନ ପ୍ରଦେଶର ନିଙ୍ଗଡେ ସହର ନିକଟରେ ଅବସ୍ଥିତ। ବର୍ତ୍ତମାନର ଆଧୁନିକ ଜ୍ଞାନକୌଶଳ ସାହାଯ୍ୟରେ ନୁହେଁ ବରଂ ଶହ ଶହ ବର୍ଷ ପୂର୍ବେ ଏହି ଗାଁର ଉତ୍ପତି।
କୌତୁହଳର ବିଷୟ ହେଉଛି ଏହି ଗାଁ ଭାସମାନ ଡଙ୍ଗା ଉପରେ ଅବସ୍ଥିତ। ଏହି ଗାଁରେ ୨୦୦୦ ରୁ ଅଧିକ ଘର ଅଛି। ଏହା ହେଉଛି ପୃଥିବୀର ଏକମାତ୍ର ଗ୍ରାମ ଯାହା ସମୁଦ୍ର ଉପରେ ରହିବା ପାଇଁ ସ୍ଥାପିତ ହୋଇଛି। ପ୍ରାୟ ୧୩୦୦ ବର୍ଷ ପୂର୍ବେ ଏହି ବସ୍ତି ସ୍ଥାପିତ ହୋଇଥିଲା ଏବଂ ବର୍ତ୍ତମାନ ସେଠାରେ ପ୍ରାୟ ଅଢ଼େଇ ହଜାର ଲୋକ ବାସ କରୁଛନ୍ତି। ଏଠାକାର ଲୋକମାନେ ମତ୍ସ୍ୟଜୀବୀ ଅଟନ୍ତି। ମାଛ ମାରି ସେମାନେ ରୋଜଗାର କରନ୍ତି। ତେବେ ଗାଁର ଲୋକମାନେ ଭାସମାନ ଘର ସହିତ ବିରାଟ କାଠ ନିର୍ମିତ ପ୍ଲାଟଫର୍ମ ତିଆରି କରିଛନ୍ତି, ଯେଉଁଠାରେ ସେମାନଙ୍କର ପିଲାମାନେ ଖେଳନ୍ତି ଏବଂ ଅନ୍ୟାନ୍ୟ କାର୍ଯ୍ୟକ୍ରମ ଆୟୋଜିତ ହୋଇଥାଏ। ଏଠାକାର ଲୋକଙ୍କୁ ଟାଙ୍କା କୁହାଯାଏ।
ଏହି ଗାଁର ପ୍ରାୟ ୧୩୦୦ ବର୍ଷ ପୁରୁଣା ଇତିହାସ ରହିଛି। ଏହି ମତ୍ସଜୀବୀଙ୍କ ପୂର୍ବପୁରୁଷମାନେ ଶାସକଙ୍କ ଦ୍ୱାରା ନିର୍ଯାତିତ ହୋଇଥିଲେ। ଫଳରେ ସେମାନେ ସମୁଦ୍ର ମଧ୍ୟରେ ରହିବାକୁ ଚାଲିଆସିଥିଲେ। ସେବେଠାରୁ ପୀଢ଼ି ପରେ ପୀଢ଼ି ଏଠାରେ ବାସ କରିଆସୁଛନ୍ତି।
