ପୁଣେ,୧୫।୬: କରୋନା ମହାମାରୀର ଦ୍ୱିତୀୟ ଲହର ଲକ୍ଷ ଲକ୍ଷ ଲୋକଙ୍କ ଜୀବନ ନେଇଛି। ଦ୍ୱିତୀୟ ଲହର ସମୟରେ କରୋନା ଭୂତାଣୁର ସବୁଠାରୁ ବିପଜ୍ଜନକ ଭାରିଏଣ୍ଟ ଦେଖାଦେଇଛି। ଏହି କାରଣରୁ କରୋନା ସଂକ୍ରମିତ ରୋଗୀମାନେ ନିଃଶ୍ୱାସ ନେବାରେ ଅସୁବିଧାର ସମ୍ମୁଖୀନ ହେଉଛନ୍ତି। ଅମ୍ଳଜାନ ଅଭାବରୁ ଅନେକ ଲୋକଙ୍କର ମୃତ୍ୟୁ ହୋଇଛି। ଏପରି ପରିସ୍ଥିତିରେ ପୁଣେର ଏକ କମ୍ପାନୀ ଏକ ସ୍ବତନ୍ତ୍ର ପ୍ରକାରର ମାସ୍କ ପ୍ରସ୍ତୁତ କରିଛି। ଏହି ମାସ୍କ ୩ଡି ପ୍ରିଣ୍ଟିଂ ଏବଂ ଔଷଧର ମିଶ୍ରଣରୁ ନିର୍ମିତ କରାଯାଇଛି। ଯାହା ସଂସ୍ପର୍ଶରେ ଆସୁଥିବା ଭୂତାଣୁକୁ ନିଷ୍କ୍ରିୟ କରିଥାଏ। ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ବିଭାଗ ସୂଚନା ଦେଇଛି ଯେ ଥିଙ୍କର୍ ଟେକ୍ନୋଲୋଜି ଇଣ୍ଡିଆ ପିଭି ଲିମିଟେଡ (Thincr Technologies India Private Limited) ଦ୍ୱାରା ବିକଶିତ ଏହି ମାସ୍କରେ ଆଣ୍ଟି-ଭାଇରାଲ ଏଜେଣ୍ଟର ଆବରଣ ରହିଛି। ଏକ ପରୀକ୍ଷଣରୁ ଜଣାପଡିଛି ଯେ, ଏହି ଆବରଣ SARS-CoV 2କୁ ନିଷ୍କ୍ରିୟ କରିଥାଏ। ବିଭାଗ କହିଛି ଯେ ଏହି ଆବରଣରେ ସୋଡିୟମ ଓଲେଫିନ ସଲଫୋନେଟ୍ ଆଧାରିତ ମିଶ୍ରଣ ବ୍ୟବହାର କରାଯାଇଛି। ଯେତେବେଳେ ଏହି ଆବରଣ ସଂସ୍ପର୍ଶରେ କରୋନା ଭୂତାଣୁ ଆସେ, ତାହାର ବାହାର ଝିଲ୍ଲୀ ନଷ୍ଟ ହୋଇଯାଏ।
