ଭୁବନେଶ୍ୱର, ୧୭ା୬ (ବ୍ୟୁରୋ): କୋଭିଡ୍ ରୋଗୀଙ୍କ ପାଇଁ ଏବେ ଜୀବନ ରକ୍ଷକ ସାଜିଛି ଏକ୍ମୋ ମେଶିନ। କିନ୍ତୁ ରାଜ୍ୟରେ ଏହି ମେଶିନର ଅଭାବ ଥିବାରୁ ବହୁ ଗୁରୁତର ରୋଗୀ ରାଜ୍ୟ ବାହାରକୁ ଚିକିତ୍ସା ପାଇଁ ଯାଉଛନ୍ତି। ତେବେ ସବୁ ରୋଗୀ ଏକ୍ମୋ ଦ୍ୱାରା ଭଲ ହେଉଛନ୍ତି କି ନାହିଁ ସେ ସମ୍ପର୍କରେ ବୁଧବାର ସୂଚନା ଦେଇଛନ୍ତି ପ୍ରଫେସର ଡା. ବାନାମ୍ବର ରାୟ। ସେ କହିଛନ୍ତି, ଫୁସ୍ଫୁସ୍ ବହୁତ ଖରାପ ହେଲେ ଭେଣ୍ଟିଲେଟର କାମ କରିପାରେ ନାହିଁ। କୋଭିଡ୍ ବେଳେ ଭେଣ୍ଟିଲେଟରକୁ ୧୦ଜଣ ଗଲେ, ପ୍ରାୟ ୨ ଜଣ ବଞ୍ଚନ୍ତି। କିନ୍ତୁ ଏକ୍ମୋ ସପୋର୍ଟରେ ହୁଏତ ୧୦ ଜଣରୁ ୪ଜଣ ବଞ୍ଚତ୍ ଯାଇପାରନ୍ତି। ଏକ୍ମୋ ଦ୍ୱାରା ଯେ ସମସ୍ତେ ବଞ୍ଚତ୍ବେ ସେମିତି ଭାବିବା ଠିକ୍ ନୁହେଁ। ଏକ୍ମୋରେ ରୋଗୀଙ୍କ ରକ୍ତ ଜମାଟ ବାନ୍ଧିବା, ଇନ୍ଫେକସନ୍ର ଆଶଙ୍କା ଥାଏ ବୋଲି ସେ କହିଛନ୍ତି।
ଏକ୍ମୋ ଚିକିତ୍ସା ସମ୍ପର୍କରେ ପ୍ରଫେସର ରାୟ କହିଛନ୍ତି, ଶରୀର ଭିତରେ ଫୁସ୍ଫୁସ୍ ଯେଉଁ କାମ କରେ, ଶରୀର ବାହାରେ ଏକ୍ମୋ ତାହା କରେ। ଶରୀର ଭିତରେ ଥିବା ରକ୍ତ ପରିଷ୍କାର କରି ପୁଣି ଶରୀରକୁ ଛାଡ଼େ। ଯେପର୍ଯ୍ୟନ୍ତ ଫୁସଫୁସ୍ ଖରାପ ଥିବ, ସେପର୍ଯ୍ୟନ୍ତ ଏକ୍ମୋ ରକ୍ତ ପରିଷ୍କାର କାମ କରିବ। ସ୍ବାଇନ୍ ଫ୍ଲୁ, ନିମୋନିଆ, ଲଙ୍ଗସ ଫାଇବ୍ରୋସିସ୍ ହେଲେ ଏକ୍ମୋ ବ୍ୟବହାର ହୋଇଥାଏ। କାହାର ଫୁସ୍ଫୁସ୍ ଟ୍ରାନ୍ସପ୍ଲାଣ୍ଟ ହେଲେ, ଏକ୍ମୋ ବ୍ୟବହାର କରାଯାଇଥାଏ। ଏହା ଏକ ଚିକିତ୍ସା ପଦ୍ଧତି ନୁହେଁ, ଏହା କେବଳ ଏକ ସପୋର୍ଟ ବୋଲି ଡା. ରାୟ କହିଛନ୍ତି।
ସୂଚନାଯୋଗ୍ୟ, ରାଜ୍ୟରେ ଚଳିତ ମାସ ବହୁ ଗୁରୁତର ରୋଗୀ ଏକ୍ମୋ ଚିକିତ୍ସା ପାଇଁ ଏୟାର ଲିଫ୍ଟିଂ ହୋଇ ଚେନ୍ନାଇ, କୋଲକାତା ଯାଇଛନ୍ତି। ଏହି ଚିକିତ୍ସା ପାଇଁ ଦୈନିକ ପ୍ରାୟ ୨ଲକ୍ଷ ଟଙ୍କା ଖର୍ଚ୍ଚ ହୋଇଥାଏ। ତେବେ ରୋଗୀ କେତେ ଦିନ ଏହି ମେଶିନ ସପୋର୍ଟର ଆବଶ୍ୟକ କରିବ ତାହା ରୋଗୀର ସ୍ବାସ୍ଥ୍ୟାବସ୍ଥା ଉପରେ ନିର୍ଭର କରେ ବୋଲି ସେ ସୂଚନା ଦେଇଛନ୍ତି।
