ନୂଆଦିଲ୍ଲୀ,୨୫।୬: ଦିଲ୍ଲୀର ୨ କୋଟି ଲୋକଙ୍କ ଜୀବନ ପାଇଁ ସଂଗ୍ରାମ କରିବା ମୋ ଅପରାଧ। ତୁମେ ଯେତେବେଳେ ନିର୍ବାଚନ ରାଲିରେ ମାତିଥିଲ, ମୁଁ ସେତେବେଳେ ଅକ୍ସିଜେନ ଯୋଗାଡ଼ ପାଇଁ ରାତି ରାତି ଶୋଇନାହିଁ। ଅକ୍ସିଜେନ ପାଇଁ ମୁଁ ନେହୁରା ହୋଇଛି। ଅକ୍ସିଜେନ ଅଭାବରୁ ଲୋକେ ତାଙ୍କ ପରିବାରବର୍ଗଙ୍କୁ ହରାଇଛନ୍ତି। ଦୟାକରି ସେମାନଙ୍କୁ ମିଛୁଆ କୁହ ନାହିଁ। ଏହା ଖୁବ୍ ବାଧୁଛି। ବିରୋଧୀ ଭାଜପାକୁ ଏଭଳି ସ୍ବରରେ କଡ଼ା ଜବାବ ଦେଇଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ।
କରୋନା ଦ୍ୱିତୀୟ ଲହର ଶୀର୍ଷରେ ଥିବାବେଳେ ଦିଲ୍ଲୀରେ ଅକ୍ସିଜେନ ଅଭାବକୁ ବଢ଼େଇ ଚାଢ଼େଇ କୁହାଯାଇଥିଲା। ଏପରି କି ଆବଶ୍ୟକତାଠାରୁ ୪ ଗୁଣ ଅଧିକ ଅକ୍ସିଜେନ ଦାବି କରିଥିଲେ ଦିଲ୍ଲୀ ମୁଖ୍ୟମନ୍ତ୍ରୀ। ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ ଅକ୍ସିଜେନ ଅଡିଟ୍ କମିଟି ଦିଲ୍ଲୀ ସରକାରଙ୍କୁ ଏଭଳି ସମାଲୋଚନା କରିଥିବା ଭାଜପା ପକ୍ଷରୁ ଦାବି କରାଯାଇଛି। ଏହାକୁ କେନ୍ଦ୍ର କରି ସହ କେଜରଓ୍ବାଲଙ୍କ ଇସ୍ତଫା ଦାବି କରିଥିଲା ଭାଜପା। ଏହାକୁ ପୂର୍ବରୁ ଉପ ମୁଖ୍ୟମନ୍ତ୍ରୀ ମନୀଷ ଶିଶୋଦିଆ ପ୍ରତ୍ୟାଖ୍ୟାନ କରିଛନ୍ତି।
