ଭୁବନେଶ୍ୱର,୨୦ା୬(ବ୍ୟୁରୋ): ସ୍ମାର୍ଟ ସିଟି ଭୁବନେଶ୍ୱର ଉତ୍ତମ ବାସୋପଯୋଗୀ ସହର ତାଲିକାରେ ସ୍ଥାନ ପାଇଛି । ଦେଶର ପ୍ରମୁଖ ୧୦ଟି ସହର ମଧ୍ୟରୁ ଏହା ୪ର୍ଥ ସ୍ଥାନ ହାସଲ କରିଛି। ସେଣ୍ଟର ଫର୍ ସାଇନ୍ସ ଆଣ୍ଡ ଏନ୍ଭାଇରନମେଣ୍ଟ(ସିଏସ୍ଇ) ଇଜ୍ ଅଫ୍ ଲିଭିଂ ଇଣ୍ଡେକ୍ସ ରିପୋର୍ଟ ଅନୁଯାୟୀ ଦେଶରେ ବେଙ୍ଗାଲୁରୁ ସର୍ବୋତ୍ତମ ରହଣି ରାଜଧାନୀର ମାନ୍ୟତା ହାସଲ କରି ୧ ନମ୍ବର ସ୍ଥାନରେ ରହିଥିବା ବେଳେ ଦ୍ୱିତୀୟରେ ଚେନ୍ନାଇ, ତୃତୀୟରେ ଶିମ୍ଲା ଏବଂ ଚତୁର୍ଥରେ ଭୁବନେଶ୍ୱର ରହିଛି।
ଏହି ମାନ୍ୟତା ହାସଲ ପାଇଁ ୪ ପ୍ରକାର ମାନଦଣ୍ଡ ଧାର୍ଯ୍ୟ କରାଯାଇଥିଲା। ଗୁଣବତ୍ତାସମ୍ପନ୍ନ ଜୀବନଧାରଣ, ଅର୍ଥନୈତିକ ସାମର୍ଥ୍ୟ, ସହନଶୀଳତା ଓ ନାଗରିକଙ୍କୁ ମିଳୁଥିବା ସୁବିଧା ।
ଇଜ୍ ଅଫ୍ ଲିଭିଂ ଇଣ୍ଡେକ୍ସରେ ବେଙ୍ଗାଲୁରୁ ୬୬.୭ ସ୍କୋର କରିଥିବା ବେଳେ ଚେନ୍ନାଇ ୬୨.୬୧, ଶିମ୍ଲା ୬୦.୯ ଏବଂ ଭୁବନେଶ୍ୱର ୫୯.୮୫ ସ୍କୋର କରିଛି। ଆର୍ଥିକ ଦକ୍ଷତା ସର୍ଭେରେ ଭୁବନେଶ୍ୱର ୧୦୦ରୁ ୧୧.୫୭ ସ୍କୋର କରିଛି। ସିଏସ୍ଇ ପକ୍ଷରୁ କରାଯାଇଥିବା ସର୍ଭେରେ ମୁମ୍ବାଇ ୫ମ, ଦିଲ୍ଲୀ ୬ଷ୍ଠ, ଭୋପାଳ ୭ମ, ରାୟପୁର ୮ମ, ଗାନ୍ଧୀନଗର ୯ମ ଓ ଜୟପୁର ୧୦ମରେ ରହିଛି ।
ରାଜଧାନୀ ଭୁବନେଶ୍ବର ସିଏସ୍ଇ ସର୍ଭେର ଚତୁର୍ଥ ସ୍ଥାନରେ ରହିଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖୁସି ପ୍ରକଟ କରିଛନ୍ତି । ସମଗ୍ର ଦେଶରେ ଭୁବନେଶ୍ୱର ଅନୁକୂଳ ପରିବେଶ ଭାବରେ ଚତୁର୍ଥ ସ୍ଥାନରେ ରହିଛି । ଭୁବନେଶ୍ବର ପଛରେ ଦିଲ୍ଲୀ। ଇଜ୍ ଅଫ୍ ଲିଭିଂ ଇଣ୍ଡେକ୍ସରେ ଭୁବନେଶ୍ବର ସ୍ଥାନ ପାଇବା ଓଡ଼ିଶା ପାଇଁ ଗର୍ବର ବିଷୟ ହୋଇଛି । ନାଗରିକ ମତାମତ ସର୍ଭେ ଆଧାରରେ ଭୁବନେଶ୍ୱରକୁ ୧୦୦ରୁ ୯୪.୮ ପ୍ରତିଶତ ମାର୍କ ମିଳିଥିବାବେଳେ ବେଙ୍ଗାଲୁରୁକୁ ୭୮ ପ୍ରତିଶତ, ଚେନ୍ନାଇକୁ ୮୨.୬ ପ୍ରତିଶତ , ଶିମ୍ଲାକୁ ୮୩.୩୯ ପ୍ରତିଶତ ମାର୍କ ମିଳିଛି । ସେହିଭଳି ଦେଶର ରାଜଧାନୀ ଦିଲ୍ଲୀକୁ ୬୯. ୪ ପ୍ରତିଶତ ମାର୍କ ମିଳିଛି ।
ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟୁଇଟ୍ କରି ଅଭିନନ୍ଦନ ଜଣାଇଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ଯେ ରହିବା ଲାଗି ସବୁଠାରୁ ଅନୁକୂଳ ରାଜଧାନୀ ତାଲିକାରେ ଭୁବନେଶ୍ବର ସ୍ଥାନ ପାଇଛି । ଗତ ମାର୍ଚ୍ଚରେ ଗୃହ ନିର୍ମାଣ ଓ ସହରାଞ୍ଚଳ ବ୍ୟାପାର ମନ୍ତ୍ରୀଙ୍କ ଦ୍ବାରା ପ୍ରକାଶିତ ଇଜ୍ ଅଫ୍ ଲିଭିଂ ସିଟି ତାଲିକାରେ ଭୁବନେଶ୍ବର ଦ୍ୱିତୀୟ ସ୍ଥାନ ହାସଲ କରିଥିଲା।
