ନୂଆଦିଲ୍ଲୀ, ୧୩।୬: ଦିଲ୍ଳୀରେ କରୋନା ସଂକ୍ରମଣ ହ୍ରାସ ପାଇଥିବାରୁ ସରକାର ଅନ୍ଲକ ପ୍ରକ୍ରିୟାକୁ ଆହୁରି କୋହଳ କରିଛନ୍ତି। ସୋମବାରଠାରୁ ମଲ୍ ଓ ମାର୍କେଟଗୁଡ଼ିକ ପ୍ରତିଦିନ ଖୋଲିବାକୁ ଥିବା ବେଳେ ରେଷ୍ଟୁରାଣ୍ଟଗୁଡ଼ିକକୁ ୫୦ ପ୍ରତିଶତ କ୍ଷମତା ସହ ଖୋଲିବାକୁ ଅନୁମତି ଦିଆଯାଇଛି। ସାପ୍ତାହିକ ବଜାର ଏବଂ ଧର୍ମପୀଠଗୁଡ଼ିକ ସୋମବାରଠାରୁ ଖୋଲିବ ବୋଲି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଘୋଷଣା କରିଛନ୍ତି। ସେହିପରି ସେଲୁନ, ବିଉଟି ପାର୍ଲର ଓ ବାରିକ ଦୋକାନ ମଧ୍ୟ ସୋମବାରଠାରୁ ଖୋଲିବ। ଅଳ୍ପ କେତେକ ନିଷିଦ୍ଧ କାର୍ଯ୍ୟକୁ ବାଦ୍ ଦେଲେ ସୋମବାର ସକାଳ ୫ଟାରୁ ଅନ୍ୟ ସବୁ କର୍ଯ୍ୟକଳାପକୁ ଅନୁମତି ଦିଆଯାଇଛି। ଗତ ସପ୍ତାହରେ ମାର୍କେଟ, ମଲ୍ ଏବଂ ମାର୍କେଟ କମ୍ପ୍ଲେକ୍ସଗୁଡ଼ିକୁ ଯୁଗ୍ମ-ଅଯୁଗ୍ମ ଆଧାରରେ ଖୋଲିବାକୁ ଅନୁମତି ମିଳିଥିବା ବେଳେ ସୋମବାରଠାରୁ ସବୁଦିନ ସକାଳ ୧୦ରୁ ରାତି ୮ଟା ପର୍ଯ୍ୟନ୍ତ ଖୋଲିବ। ପ୍ରତି ମ୍ୟୁନିସିପାଲିଟି ଜୋନ୍ରେ ଦିନକୁ ଗୋଟିଏ ସାପ୍ତାହିକ ହାଟ ଖୋଲାଯିବ ବୋଲି କେଜ୍ରିଓ୍ବାଲ କହିଛନ୍ତି। ଯଦି ସଂକ୍ରମଣ ଆହୁରି କମେ ତେବେ ଆଗାମୀ ଦିନରେ କଟକଣା ଅଧିକ କୋହଳ ହେବ ବୋଲି ଦିଲ୍ଲୀ ମୁଖ୍ୟମନ୍ତ୍ରୀ କହିଛନ୍ତି। ତେବେ ସ୍କୁଲ୍ କଲେଜ ଆଦି ସମସ୍ତ ଶିକ୍ଷାନୁଷ୍ଠାନ, ସିନେମା ହଲ, ମଲ୍ଟିପ୍ଲେକ୍ସ, ଥିଏଟର, ଜିମ୍, ସ୍ପା, ଅଡିଟୋରିୟମ, ବଙ୍କେଟ୍ ହଲ୍, ପ୍ରମୋଦ ଉଦ୍ୟାନ, ସ୍ବାଟର ପାର୍କ ଆଦି ଜୁନ୍ ୨୧ ସକାଳ ୫ଟା ପର୍ଯ୍ୟନ୍ତ ବନ୍ଦ ରହିବ।
