କୋଲକାତା,୧୧।୬: ପଶ୍ଚିମବଙ୍ଗରେ ନିର୍ବାଚନ ହାରିବା ପରେ ଭାଜପାକୁ ପୁଣି ଥରେ ଏକ ବଡ଼ ଝଟ୍କା ଲାଗିଛି। ଭାଜପାର ବରିଷ୍ଠ ନେତା ମୁକୁଲ ରୟ ପୁଅ ଶୁଭ୍ରାଂଶୁଙ୍କ ସହ ତୃଣମୂଳ କଂଗ୍ରେସ (ଟିଏମ୍ସି)ରେ ସାମିଲ ହୋଇଛନ୍ତି। ପ୍ରାୟ ୪ବର୍ଷ ପରେ ମୁକୁଲ ଓ ପୁଅ ଶୁଭ୍ରାଂଶୁ ଶୁକ୍ରବାର ତୃଣମୂଳ ଭବନରେ ଦଳର ସଦସ୍ୟତା ଗ୍ରହଣ କରିଛନ୍ତି। ଏହି ସମୟରେ ମୁଖ୍ୟମନ୍ତ୍ରୀ ମମତା ବାନାର୍ଜୀ, ଏମ୍ପି ଅଭିଷେକ ବାନାର୍ଜୀ ମଧ୍ୟ ଉପସ୍ଥିତ ଥିଲେ। ଏମ୍ପି ଅଭିଷେକ ବାନାର୍ଜୀ ତାଙ୍କୁ ପୁଷ୍ପଗୁଚ୍ଛ ପ୍ରଦାନ କରି ଦଳରେ ସ୍ବାଗତ କରିଥିଲେ। ଏହି ଅବସରରେ ମମତା କହିଛନ୍ତି, ଆଜି ଘରର ପୁଅ ଘରକୁ ଫେରିଛି। ମୁକୁଲ ସହ କୌଣସି ମତଭେଦ ନାହିଁ। ଯେଉଁମାନେ ଦଳ ବିରୋଧୀ କାର୍ଯ୍ୟ କରିଛନ୍ତି, ସେମାନଙ୍କର ଦଳରେ ଫେରିବା ଅସମ୍ଭବ ବୋଲି ମମତା କହିଛନ୍ତି। ଅନ୍ୟପଟେ ଦଳକୁ ଫେରି ମୁକୁଲ ଖୁସିବ୍ୟକ୍ତ କରିବା ସହ ମମତାଙ୍କୁ ଧନ୍ୟବାଦ ଜଣାଇଛନ୍ତି।
