ଆଇଆଇଟି ଛାତ୍ରଙ୍କୁ ପ୍ରଥମେ ବିବାହ କରିଥିଲେ ନୀନା; ବର୍ଷେ ପରେ…

ବମ୍ବେ: ଅଭିନେତ୍ରୀ ନୀନା ଗୁପ୍ତାଙ୍କ ଅଟୋବାୟୋଗ୍ରାଫି ‘ସଚ କହୁଁ ତୋ’ ରିଲିଜ ହୋଇଛି। ଏଥିରେ ସେ ନିଜର ବ୍ୟକ୍ତିଗତ ଜୀବନକୁ ନେଇ ଅନେକ ରହସ୍ୟ ଉପରୁ ପରଦା ଉଠାଇଛନ୍ତି। ସେଥିରୁ ଗୋଟିଏ ହେଲା ତାଙ୍କର ପ୍ରଥମ ବିବାହ। ନୀନା ପ୍ରଥମେ ଜଣେ ଆଇଆଇଟି ଛାତ୍ରଙ୍କୁ ବିବାହ କରିଥିଲେ। ହେଲେ ଏହି ବିବାହ କେବଳ ଏକ ବର୍ଷ ଚାଲିଥିଲା।

ସେତେବେଳେ ନୀନା ସଂସ୍କୃତରେ ନିଜର ମାଷ୍ଟର ଡିଗ୍ରୀ କରୁଥିଲେ। ଏହି ସମୟରେ ସେ ଆଇଆଇଟି ଛାତ୍ର ଅମ୍ଳାନ କୁସୁମ ଘୋଷଙ୍କ ପ୍ରେମରେ ପଡ଼ିଥିଲେ। ଉଭୟ କ୍ୟାମ୍ପସ ହେଉ ଅଥବା ହୋଟେଲ ନଚେତ ନୀନାଙ୍କ ଘର ପାଖରେ ଲୁଚିଛପି ମିଳାମିଶା କରୁଥିଲେ। ଅମ୍ଳାନଙ୍କ ପିତାମାତା ଅନ୍ୟ ସହରରେ ରହୁଥିଲେ ହେଲେ ତାଙ୍କ ଜେଜେବାପା ନୀନାଙ୍କ କଲୋନୀରେ ରହୁଥିଲେ। ଏଣୁ ଉଭୟ ପୂଜାପର୍ବ ଏବଂ ଛୁଟିଦିନ ଗୁଡ଼ିକ ଏକାସହ ବିତାଉଥିବା ନୀନା ପୁସ୍ତକରେ ଲେଖିଛନ୍ତି।

ପରେ ନୀନା-ଅମ୍ଳାନଙ୍କ ବିଷୟରେ ପରିବାରଲୋକ ଜାଣିଥିଲେ। ହେଲେ ବାଧା ନ ଉପୁଜାଇ ସେମାନେ ବିବାହ ପାଇଁ ରାଜି ହୋଇଥିଲେ। ଫଳରେ ସେମାନଙ୍କ ବିବାହ ହୋଇଥିଲା। ଏହାର କିଛି ଦିନ ପରେ ଉଭୟ ଉଭୟଙ୍କ ପାଇଁ ଠିକ୍‌ ଜୀବନସାଥୀ ହୋଇ ନ ଥିବା ସେମାନେ ହୃଦୟଙ୍ଗମ କରିଥିଲେ। ମାତ୍ର କେବେହେଲେ ଉଭୟ ଝଗଡ଼ା କରି ନ ଥିଲେ। ଉକ୍ତ ବିବାହକୁ ନେଇ ଏବେ ବି ମନରେ କୌଣସି କଟୁ ଭାବନା ନ ଥିବା ନୀନା କହିଛନ୍ତି।