ନୂଆଦିଲ୍ଲୀ,୧୫।୬: ଆସନ୍ତା ୧୮ ତାରିଖରୁ ୟୁକେର ସାଉଥାମ୍ପଟନଠାରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବା ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲ। ଏହି ମ୍ୟାଚ୍ ପୂର୍ବରୁ ଭାରତୀୟ ଓପନର ରୋହିତ ଶର୍ମାଙ୍କୁ ଗୁରୁତ୍ୱପୂର୍ଣ୍ଣ ବ୍ୟାଟିଂ ଟିପ୍ସ ଦେଇଛନ୍ତି ପୂର୍ବତନ ବ୍ୟାଟ୍ସମ୍ୟାନ ଭିଭିଏସ୍ ଲକ୍ଷ୍ମଣ।
ମୋ ମତରେ ପ୍ରତ୍ୟେକ ଓପନରଙ୍କ ପାଇଁ ଅଫ୍ ଷ୍ଟମ୍ପ କେଉଁଠାରେ ଜାଣିବା ନିହାତି ଦରକାର। ଇନିଂସ ଓପନ କରିବା ପରଠୁ ରୋହିତ ଶୃଙ୍ଖଳିତ ପ୍ରଦର୍ଶନ କରୁଛନ୍ତି। ଅଫ୍ ଷ୍ଟମ୍ପ କେଉଁଠାରେ ତାଙ୍କୁ ଜଣା। ୟୁକେରେ ସେଭଳି ଖେଳିଲେ ରୋହିତ ସଫଳ ହେବେ। ସେ ଭାରତୀୟ ଦଳ ପାଇଁ ଜଣେ ମ୍ୟାଚ୍ ଓ୍ବିନର। ଅଫ୍ ଷ୍ଟମ୍ପ କେଉଁ ଠାରେ ଜାଣିବା ପରେ ହିଁ ଜଣେ ବ୍ୟାଟ୍ସମ୍ୟାନ ବାହାର ବଲକୁ ଛାଡ଼ିପାରିବ। ଏହା ଉପରେ ରୋହିତଙ୍କୁ ଗୁରୁତ୍ୱ ଦେବା ଦରକାର। ବୋଲ୍ଟ ତାଙ୍କୁ ଚ୍ୟାଲେଞ୍ଜ କରିପାରିବେ। କାରଣ ଅଫ୍ ଷ୍ଟମ୍ପ ବାହାରୁ ବଲକୁ ଭିତରକୁ ଆଣିବାରେ ସେ ସିଧହସ୍ତ। ଏଣୁ ଏହି ବାମହାତୀ ପେସରଙ୍କୁ ଖେଳିଲା ବେଳେ ରୋହିତ ବାମ ଗୋଡ଼ ଉଠାଇପାରିବେ ନାହିଁ। ଏହି ଦୁଇଟି କଥା ଉପରେ ରୋହିତଙ୍କୁ ଗୁରୁତ୍ୱ ଦେବାକୁ ପଡ଼ିବ ବୋଲି ଲକ୍ଷ୍ମଣ କହିଛନ୍ତି।
